Álemde áıelder sany azaıyp barady - Le Figaro
NUR-SULTAN. QazAqparat - Frantsýzdyq Le Figaro basylymynyń jazýyna qaraǵanda, álemde áıelderdiń sany azaıyp barady.
«PNAS jýrnalynda jarııalanǵan halyqaralyq zertteý nátıjesine sensek, Sıngapýr ýnıversıteti men AQSh ǵalymdary 1970 jyldan beri álemge 23,1 mln áıel jetispeıtinin anyqtady. Ǵalymdar álem boıynsha erler men áıelderdiń dúnıege kelý kórsetkishin zerttep, áıelderdiń sany azaıǵanyn habarlady», dep jazady Le Figaro basylymy.
Avtordyń aıtýynsha, ásirese Qytaı men Úndistanda 1970-2017 jyldar aralyǵynda áıelderdiń dúnıege kelý kórsetkishi azaıǵan.
«Bul memleketter álemdegi eń halqy kóp memleketterge jatatyndyqtan, bul jaǵdaı álem boıynsha demografııalyq dısbalanstyń týýyna ákelgen. Zertteý avtorlarynyń aıtýynsha, abort pen ýltadybystyq zertteýler de bul jaǵdaıǵa áser etkenin aıtqan. 1970 jyldan bastap balanyń jynysyn erte anyqtaýǵa bolatyn tehnologııalardyń damýy demografııalyq jaǵdaıǵa keri áserin tıgizgen, sebebi qyz balalardy aldyryp tastaý kórsetkishi artqan», dep jazady basylym.
