Álemde áıelder erlerden 18 paıyz az jalaqy alady
ASTANA. KAZINFORM — Álemde áıelder erlerge qaraǵanda orta eseppen 18 paıyz az jalaqy alady. Bul týraly jyl saıyn 18 qyrkúıekte atap ótiletin Halyqaralyq eńbekaqy teńdigi kúnine oraı Halyqaralyq eńbek uıymynyń Bas dırektory Jılber Ýngbo óz úndeýinde málimdedi, dep habarlaıdy BUU jańalyqtar qyzmeti.
Ol «qarapaıym, biraq negizgi qaǵıdany» eske saldy: qundylyǵy birdeı eńbekke birdeı aqy tólenýge tıis.
— Áńgime otbasyn, kásiporyndardy, qoǵamdastyqtar men ekonomıkany qoldap otyrǵan, alaıda eńbegine áli de ádil syıaqy ala almaı júrgen mıllıondaǵan áıel týraly bolyp otyr, — dedi ol.
Ýngbonyń aıtýynsha, úkimetter, jumys berýshiler men jumyskerler birlesken kúsh-jiger arqyly qazirgi ádiletsizdikke negiz bolyp otyrǵan qurylymdyq kedergilerdi joıyp, eńbekaqynyń teń bolýyn qamtamasyz etýge yqpal etetin zańnama men ınstıtýttardy nyǵaıta alady. Áleýmettik dıalog, onyń ishinde ujymdyq kelissózder arqyly áıelder eńbeginiń tómen baǵalaný máselesin sheshýge, jalaqy júıesiniń ashyqtyǵyn arttyrýǵa, ádilettirek eńbekaqy qurylymyn qalyptastyrýǵa jáne áıelderdiń óz ekonomıkalyq ómirine qatysty sheshimder qabyldaýǵa teń dárejede qatysýyn qamtamasyz etýge bolady.
— Eńbek salasy túbegeıli ózgeristerdi bastan ótkerip jatyr, alaıda bizdiń qaǵıdattarymyz ózgerissiz qalady. Birdeı eńbekke birdeı aqy tóleý — árbir jumyskerdiń quqyǵy, qaǵıdaty, qadir-qasıeti men áleýmettik ádilettiligine qatysty másele, — dedi Jılber Ýngbo.
Genderlik alshaqtyqty joıý
«BUU-Áıelder» qurylymynda qundylyǵy birdeı eńbekke birdeı aqy tóleý qaǵıdaty tek ádilettilik máselesi ǵana emes, ekonomıkalyq damýdyń mańyzdy sharty ekenin atap ótti. Eńbekaqydaǵy genderlik alshaqtyq áıelderdiń ómir boıy tabysynyń azaıýyna, zeınetaqy jınaqtarynyń tómendeýine jáne áleýmettik teńsizdiktiń kúsheıýine ákeledi.
«BUU-Áıelder» qurylymy mıgranttar, múgedektigi bar áıelder, sondaı-aq násildik jáne etnıkalyq azshylyq ókilderi sııaqty neǵurlym osal toptardyń jaǵdaıyna erekshe nazar aýdardy. Olar úshin eńbekaqydaǵy aıyrmashylyq kóbine odan da joǵary bolady.
Uıym málimdemesinde 2026 jyly eńbekaqy teńdigi máselesin ilgeriletý baǵytynda belgili bir nátıjelerge qol jetkizilgeni aıtylǵan. BUU-nyń Áıelder jaǵdaıy jónindegi komıssııasynyń 70-sessııasynda úkimetter, jumys berýshiler jáne jumyskerler ókilderi áıelderdiń eńbek naryǵyna tolyqqandy qatysýyna kedergi keltiretin qurylymdyq tosqaýyldardy joıýǵa daıyn ekenderin rastady.
«BUU-Áıelder» qurylymy genderlik alshaqtyqty joıýǵa bolatynyn, alaıda bul úshin árbir áıeldiń eńbegin ádil baǵalaýdy qamtamasyz etetin batyl sharalar qajet ekenin atap ótti.
Budan buryn WTA áıel tennısshiler úshin mindetti genderlik test engizgenin jazǵanbyz.
