Álemde astyq baǵasy kóterilip keledi
ASTANA. QazAqparat - AQSh-taǵy aýa raıynyń qolaısyzdyǵyna, sonymen qatar Ýkraınadaǵy turaqsyz ahýal saldarynan Qara teńiz porttarynda astyq tıeý kóleminiń tómendeý múmkindigine oraı ımporttaýshylardyń qaýiptenýine baılanysty astyqtyń álemdik baǵasy kóterilip keledi. Bul jaıynda atalǵan naryqtaǵy ahýalǵa monıtorıng jasaǵan Reseıdiń Aýyl sharýashylyǵy mınıstrligi málim etýde.
Naýryz aıynyń úshinshi aptasynda AQSh-ta jumsaq bıdaıdyń ortasha eksporttyq baǵasy 5 paıyzǵa ósip, tonnasy 300 dollarǵa jetken. Al osydan bir apta buryn ǵana bıdaı baǵasy 10 dollarǵa qymbattap, tonnasy 286 dollarǵa kóterilgen edi.
Esterińizge sala keteıik, ótken jyly elimizde taza salmaqta shamamen 19 mln. tonna astyq bastyrylǵan bolatyn. Onyń 9 mln-ǵa jýyǵyn eksportqa shyǵarý kózdelýde. Bul ótken marketıng jylymen salystyrǵanda 1,9 mln. tonnaǵa artyq.
