Álemde árbir úshinshi oqýshy býllıngke ushyraıdy - UNESCO

ASTANA. QazAqparat – Álem mektepterindegi árbir úshinshi oqýshy býllıngke tap bolady, delingen UNESCO baıandamasynda. Eýropanyń ártúrli elderi bul máseleni sheshýdiń tásilderin izdestirip jatyr, dep habarlaıdy QazAqparat Euronews-ke silteme jasap.

Ótken aptada Frantsııanyń búkil orta mektep oqýshylary úshin kıberbýllıng máselesine arnalǵan sabaq ótkizildi.

Mundaı sheshim basqa balalar qorlaǵannan keıin ózine qol jumsaǵan 13 jasar Lındsıdiń óliminen keıin qabyldandy.

Nora Tıran-Fress mektepterdegi býllıngpen kúresedi. Onyń qyzy Marıon da óz-ózine qol salǵanda on úsh jasta bolǵan.

Noranyń aıtýynsha, Marıonnyń bastan keshken qıyndyqtary mekteptiń tómengi synyptarynda bastalǵan. Ol balalarǵa jas kezinen bastap býllıng týraly aıtý mańyzdy ekenin aıtady.

Frantsııanyń, tipti Eýropanyń keıbir mektepteri býllıng týraly aıtýǵa qulyqsyz. Mysaly, Ispanııada mekteptegi kelemejdeýge baılanysty birneshe shýly oqıǵa boldy.

«Mektep, saıyp kelgende, jábirlenýshini jaqtamaıdy, kerisinshe ony buqpalap, mekteptiń atyna kir kelmes úshin máseleni barynsha jasyryp-jabýǵa tyrysady, oqıǵanyń ınspektorlarǵa jetpeýine kúsh salady», - deıdi Ispanııadaǵy býllıngtiń aldyn alý qaýymdastyǵynyń (AEPAE) basshysy Enrıke Peres-Karrılo.

Biraq qazirdiń ózinde sheshý joldary usynylyp jatyr. Jábirlenýshige qulaq asyp, buzaqylarmen jumys jasaý kerek.

«Oqýshylardyń árqaısyna jeke dara qarym-qatynas jasap, olardy aıýandyqtan aryltýǵa, máseleni sheshýge tartýǵa tyrysamyz. Bul óte tıimdi, biraq belgili bir jaǵdaılarda jazalamaý kerek degendi bildirmeıdi. «Men seniń synyptasyń úshin alańdap turmyn, ol nashar oqıdy. Sen qalaı oılaısyń? Ne isteýge bolady?» degen sııaqty suraqtar qoıý arqyly oqýshylardy da máseleni sheshýge shaqyrýǵa bolady», - deıdi mekteptegi býllıng máselesimen aınalysatyn RESIS ortalyǵynyń dırektory Jan-Per Bellon.