Álemde árbir on birinshi jumys orny týrızm salasynda ashylyp otyr
ASTANA. QazAqparat - Álemde árbir on birinshi jumys orny týrızm salasynda ashylyp otyr. Búgin Májilistegi Úkimet saǵatynda elimizdegi týrızm salasyn damytý perspektıvalary jaıynda baıandaǵan QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev osylaı málim etti.
«Jalpy týrızm salasynyń álemdik ekonomıkadaǵy róli aıtarlyqtaı mańyzǵa ıe. Máselen, álemde árbir on birinshi jumys orny týrızm salasynda ashylyp otyr. Sonymen qatar, jahandyq jalpy ishki ónimde týrızmniń úlesi toǵyz paıyzdan asyp, on paıyzǵa jetip keledi. Kóptegen elderde bul kórsetkish 20 paıyzǵa taqap otyr. Halyqaralyq týrıster sany jyl saıyn artyp, byltyr bul kórsetkish mıllıard adamnan asyp tústi», - dedi Á. Isekeshev. Mınıstrdiń sózine qaraǵanda, osylaısha týrızm salasy kóptegen elderdiń áleýmettik ekonomıkalyq damýynda negizgi qozǵaltqyshyna aınalǵan. Sonymen qatar, bul sala ekonomıkany ártaraptandyrýda keremet nátıjege, ásirese shaǵyn jáne orta bıznestiń damýyna septik bola alady.
«Halyqaralyq tájirıbege súıensek, týrızm qalyptasý barysynda oǵan qarjylyq ta, zańnamalyq turǵydan da memlekettik qoldaý qajet. Máselen, Birikken Arab Ámirligi men Túrkııa sekildi elderde bastapqy memlekettik qoldaý barynsha keńinen qamtylǵan. Sonyń nátıjesinde BAÁ-de sońǵy on jylda osy salada qamtylǵandar sany júz myńnan tórt júz myń adamǵa jetip otyr. Bul rette Úkimet tarapynan osy salaǵa qoldaý 150 mlrd. dollardan asqan bolatyn», - dedi Á. Isekeshev.
