Álemde alǵash ret soǵyp turǵan júrek sátti aýystyryldy
ASTANA. KAZINFORM — Taıvan Ulttyq ýnıversıteti aýrýhanasynyń (NTUH) hırýrgteri tarıhta alǵash ret soǵyp turǵan donorlyq júrekti sátti aýystyrdy. Bul týraly Fox News habarlady.
Transplantatsııa kezinde júrek ottegimen qanyqqan qandy úzdiksiz aıdady. Dástúrli júrek transplantatsııasy krıokonservatsııaǵa (sýyqta saqtaýǵa) negizdelgen. Mundaı jaǵdaıda organǵa qan aǵymy toqtaıdy, bul birneshe saǵat boıy otteginen aıyrylǵan júrek bulshyqetine zaqym keltirýi múmkin. Mundaı transplantatsııada deneniń júrekti qabyldamaý qaýpi bar.
Operatsııadan keıingi asqynýlardy da baıqaýǵa bolady. Buǵan jol bermeý úshin NTUH hırýrgteri organdarǵa kútim jasaýdyń arnaıy júıesin ázirledi. Ol donordyń júregine ottegimen qanyqqan qandy úzilissiz nemese tońazytqyshsyz jetkizetin portatıvti ómirdi qoldaý qurylǵysy retinde jumys isteıdi.
Bul júıe sorǵylar, oksıgenatorlar jáne rezervýarlar arqyly júrektiń deneden tys jumys isteýin qamtamasyz etedi.
— Alǵashqy ota kezinde top arnaıy qurylǵyǵa jalǵanǵan donordyń júregin áli soǵyp turǵan kezde operatsııalyq bólmeler arasynda jyljytty. Júrek transplantatsııalaǵan patsıent — dılatatsıon kardıomıopatııasy bar 49 jastaǵy áıel tez qalpyna keldi jáne júrek bulshyqeti densaýlyǵynyń negizgi kórsetkishi sanalatyn júrek fermentteriniń óte tómen deńgeıin kórsetti, — delingen habarlamada.
Stenford ýnıversıteti mundaı transplantatsııany 2023 jyly bastaǵanymen, olardyń ádisi organdy transplantatsııalaý kezinde qysqa ıshemııalyq kezeńderdi (10-30 mınýt) qamtydy. Biraq Taıvan hırýrgteriniń ádisimen jasalǵan transplantatsııada júrek soǵýyn bir sekýndqa da toqtatqan joq.
— Júrek ony alǵanǵa deıin de, odan keıin de soǵýyn jalǵastyrdy jáne ol esh toqtaǵan joq, — dedi NTUH organ transplantatsııasy tobynyń jetekshisi Chen Ih-Shýrng.
Eske sala keteıik, Anglııanyń Ulttyq densaýlyq saqtaý qyzmeti jumysyn toqtatqanyn jazǵanbyz.