Álemde ákelerdiń dekrettik demalysy analarǵa qaraǵanda segiz ese qysqa — BUU
ASTANA. KAZINFORM — Álem boıynsha ákelerdiń bala kútimine baılanysty tólemaqy tólenetin demalysynyń ortasha uzaqtyǵy analarǵa qaraǵanda segiz ese qysqa. «BUU-Áıelder» jáne Dúnıejúzilik bank tobynyń jańa zertteýinde osyndaı derek keltirilgen, dep habarlaıdy BUU jańalyqtar qyzmeti.
Sarapshylar 190 eldiń zańdaryn taldaı kele, olardyń 66-synda ákelerge tólemaqy tólenetin dekrettik demalysqa kepildik berilmeıtinin aıtady. Alty elde dekrettik demalysqa kepildik áıelderge de berilmeıdi.
Ákelerge aqyly dekrek belgilengen 124 ekonomıkanyń jartysynda onyń merzimi eki aptaǵa jetpeıdi. Elder men aýmaqtardyń shamamen úshten biri Halyqaralyq eńbek uıymynyń analarǵa keminde 14 apta aqyly demalys berý standartyn saqtamaı keledi.
Zertteýde, sonymen qatar er adamdardyń balalardy tárbıeleýde belsendi ról atqarýǵa tyrysatynyn, biraq oǵan qoldaýdyń jetkiliksiz ekeni anyqtaldy. Saýalnamaǵa qatysqan ákelerdiń 87%-y qajetti qoldaýdyń joqtyǵyna shaǵymdansa, 83%-y jumys berýshileri olarǵa ıkemdi jumys tártibin usynbaıtynyn aıtyp muńyn shaǵady.
Sarapshylardyń pikirinshe, áıelder balalar men basqa da otbasy múshelerine aqysyz kútim jasaýǵa erlerge qaraǵanda orta eseppen 2,5 ese kóp ýaqyt jumsaıdy.
Sonymen qatar, ákelerdiń bala kútimine qatysýy balalarynyń damýyna oń áser etedi jáne analardyń jumyspen qamtý múmkindikteri men tabysyna yqpal etedi.
29 qazanda atalyp ótetin Halyqaralyq qamqorlyq jáne qoldaý kúni qarsańynda «BUU-Áıelder» jáne Dúnıejúzilik bank toby elderdi otbasylyq mindetterdi teń bólýdi qamtamasyz etýge shaqyrady.
Buǵan deıin BUU qart adamdardyń quqyqtaryn qorǵaý tásilderin qaıta qaraýǵa shaqyrǵan bolatyn.
