Álemde A/H1N1 tumaýyna qarsy jaǵdaıdyń ýshyǵýyna baılanysty Qazaqstanda shuǵyl sharalar qolǵa alynýda - Densaýlyq saqtaý mınıstrligi
ASTANA. Qarashanyń 4-i. QazAqparat /Gúlmıra Álıakparova/ - Reseı, Ýkraına jáne basqa da kóptegen elderde A/H1N1 tumaýy boıynsha epıdemıologııalyq jaǵdaıdyń ýshyǵýyna baılanysty Qazaqstanda ınfektsııanyń aldyn alý boıynsha jedel sharalar qabyldanýda.
Bul týraly búgin ótken brıfıngte respýblıkanyń Bas sanıtarlyq dárigeri Keńes Ospanov málim etti, dep habarlaıdy QazAqparat.
K.Ospanovtyń atap ótkenindeı, A/H1N1 juqpasyn juqtyrýdyń ústimizdegi jylǵy jaz aılarynda anyqtalǵan 17 oqıǵadan keıin, respýblıka aýmaǵynda atalmysh ınfektsııanyń jańa derekteri tirkelgen joq.
Maýsymdyq jedel respıratorlyq vırýstyq ınfektsııa (JRVI) boıynsha jaǵdaıǵa toqtalatyn bolsaq, JRVI-ǵa qarsy ústimizdegi jylǵy qazannyń 1-nen bastap el aýmaǵynda 355 myń adam egilse de, búgingi kúnge deıin ony 146 528 adam juqtyryp úlgergen. Bul kórsetkish ótken jyldyń sáıkes ýaqytynda 137 863 boldy.
Bas sanıtarlyq dárigerdiń aıtýynsha, qazir respýblıkanyń barlyq óńirlerinde JRVI-men jáne tumaýmen syrqattaný jaǵdaıyna kúndelikti monıtorıng júrgizilip otyr. Al epıdemıologııalyq jaǵdaı kúrdelener bolsa, QR Úkimeti men jergilikti atqarýshy organdardyń rezervtegi qarajaty esebinen A/H1N1 tumaýyna qarsy vaktsına satyp alynatyn bolady. Bul maqsattarǵa 2,8 mlrd. teńge qarajat qarastyrylyp ta qoıǵan.
«Qazaqstanda da Densaýlyq saqtaý mınıstrliginiń ǵylymı-tahnıkalyq ınstıtýtynyń bazasynda pandemııalyq tumaýǵa qarsy klınıkalyq zertteýler júrgiziletin bolady. Memleket ony jasap shyǵarýǵa jetkilikti qarajat bóldi», dedi ol.
Aıta keteıik, qazir el aýmaǵyndaǵy áýejaılarda, teńiz porttarynda, temir joldar men avtomobılderdiń ótý joldarynda qolaısyz elderden kelgen jolaýshylardy A/N1N1 jaǵdaıyna tekserý júrgizetin 77 sanıtarlyq-karantındik beket jumys isteıdi. Sonymen qatar, barlyq medıtsınalyq uıymdarda A/N1N1 tumaýyna kúdigi bar naýqastardy qabyldap, ornalastyrý úshin qosymsha jaǵdaılar jasalýda.
