Álemde 4,4 mlrd adam turaqty túrde sýǵa qol jetkize almaıdy

ASTANA. KAZINFORM – Shveıtsarııalyq zertteýshiler men BUU, DDU sarapshylary ortasha tabysy tómen jáne ortasha sanalatyn 136 eldiń 4,4 mıllıardtan astam turǵyny BUU-nyń Jahandyq densaýlyq saqtaý maqsattarynda kózdelgendeı taza, qaýipsiz sýǵa turaqty túrde qol jetkize almaıdy degen qorytyndy jasap otyr.

Ǵalymdardyń tujyrymdary Science ǵylymı jýrnalyndaǵy maqalada jarııalandy. Derekter 2020 jylǵy boljamnan eki ese kóp ekenin atap ótken jón.

«Taza jáne qaýipsiz sýǵa qol jetkizý – BUU Turaqty damý maqsattarynyń negizgi baǵyty. Bizdiń esepteýlerimiz kórsetkendeı, tabysy tómen jáne ortasha elderdegi árbir úshinshi turǵyn taza sýǵa turaqty qol jetkize alady. Problema sýdyń qaldyq zattarmen lastanýynan týyndap otyr», - delingen zertteýde.

Zertteýlerge sáıkes, Ońtústik Azııa men Saharanyń ońtústigindegi Afrıka elderinde halyqtyń 75%-dan astamy taza sýǵa turaqty qol jetkize almaıdy eken. Munda sý turmystyq jáne úı janýarlary qaldyqtarynan lastanatyn kórinedi.

BUU-nyń Turaqty damý maqsattaryn júzege asyrý barysynda atalǵan elderdegi kórsetkishter jaqsaryp, ártúrli ishek ınfektsııalarymen syrqattanatyndardyń sany azaıady dep kútilip otyr.