Álemde 1 mıllıardtan astam adam qan qysymynan zardap shegýde
ASTANA. QazAqparat - Sońǵy 40 jylda qan qysymynyń joǵarylyǵynan zardap shegetin adamdar sany eki esege artyp, 1,1 mıllıardqa jetti. Buǵan Búkilálemdik densaýlyq saqtaý uıymynyń qatysýymen júrgizilgen keń aýqymdy zertteýlerdiń nátıjesi dálel bolyp otyr, dep jazady Gazeta.ru.
Búkilálemdik densaýlyq saqtaý uıymynyń málimetterinshe, zertteýge 1975 jáne 2015 jyldardaǵy kezeń qamtylǵan. Ǵalymdar buryn gıpertonııa aýqatty adamdarǵa tán aýrý bolsa, qazir ol jaǵdaıy tómen adamdarda kóp kezdesetindigin aıtýda. Gıpertonııadan zardap shegetin adamdar sany Afrıka men Ońtústik Azııada erekshe baıqalýda. Joǵary qan qysymynan zardap shegetin azamattardyń jartysy Azııa memleketterinde ómir súrip jatyr.
Ońtústik Koreıa, AQSh pen Kanada halqy gıpertonııamen eń az aýyratyn memleketterdiń qatarynda. Alaıda, ǵalymdar qan qysymynyń joǵarylyǵynan zardap shegýshiler sany nege kedeı memleketterde kóp ekendigin dáleldeı almaı keledi. Basty sebepterdiń biri - turǵyndar ustanatyn dıetamen baılanysty. Baqýatty memleketterdiń turǵyndary kókónister men jemisterdi kóbirek tutynady.
