Álemdi tańǵaldyrǵan qazaqy tazy: Chelsıdiń ıesi Italııadaǵy jeńis týraly aıtyp berdi
ASTANA. KAZINFORM — Jas qazaqy tazy Chelsı Italııada ótken álem chempıonatynda úzdik ıtterdiń tórttigine endi. Chempıonnyń ıesi, 56 jastaǵy Murat Janpeıisov Kazinform tilshisine álemdik baıqaýǵa daıyndyq, Chelsıdiń minezi jáne bul jeńistiń Qazaqstan úshin mańyzy týraly aıtyp berdi.
Murat Janpeıisov úshin tazy baptaý – ákeden balaǵa jalǵasqan dástúr.
— Men Semeıdenmin, 1980-jyldardan bastap ıt asyrap kelemin. Ákem de buryn tazy ustaǵan, ıtke degen qyzyǵýshylyǵym sodan bastaldy. Keıin 2000 jyly Almatyǵa kóship, jeke úıge qonystanǵan soń qaıtadan tazy ósire bastadym. Alǵashynda ańshylyq úshin, hobbı retinde ustadym. Qazir úıimde tórt ıt bar, barlyǵy da tazy. Buryn tóbet te ustadym, biraq qazir tek tazy ósiremin. Eń alǵashqy ıtimdi aýyldan ákelgen edim, — deıdi ol.
Qazir Chelsıge bir jyl bir aı bolǵan. Iesiniń aıtýynsha, jas chempıon óte jýas ári sabyrly.
— Chelsı óte meıirimdi, ony bári jaqsy kóredi. Minezi baısaldy, sonymen qatar tamasha ańshy. Ańshylyqty ózi de erekshe unatady. Anasy da ańǵa túskende eshteńeden taısalmaıtyn. Chelsıdiń túsi de erekshe ádemi, sút tústes, — deıdi Murat Janpeıisov.
Iesiniń kórmelerge kásibı túrde qatysýy 2020 jyly «Qansonar» birlestigine múshe bolǵannan keıin bastalǵan.
— Bizdiń klýbta tazyǵa tekseris júrgiziledi, kórmeler uıymdastyrylady, mindetti túrde taldaýlar alynyp, tuqymnyń qan tazalyǵy tekseriledi, — deıdi ol.
Italııaǵa barar aldynda Chelsı Almaty men Astanada ótken kórmelerge qatysqan. Iesi ony mundaı sharalarǵa alty aılyǵynan bastap shyǵara bastaǵan.
Álem chempıonaty qarsańynda tazy bir aıǵa jýyq arnaıy bapkerdiń jetekshiligimen daıyndyqtan ótti. Jas ıtke tózimdilik pen ustamdylyq úıretilip, ózge janýarlarǵa sabyrmen qaraý, beıtanys tuqymdarmen janjalǵa túspeý daǵdylary qalyptastyryldy. Sondaı-aq durys júrý máneri, qozǵalysy jáne rıngtegi ózin ustaýy pysyqtaldy.
Iesiniń aıtýynsha, arnaıy dıeta qajet bolmaǵan. Chelsı kádimgi jemmen qorektengen. Sonymen birge kórmede sarapshylar onyń boıyn, salmaǵyn jáne tuqym standartyna sáıkestigin baǵalaǵan.
Italııadaǵy álem chempıonatyna Qazaqstannan barlyǵy 15 tazy barǵan.
— Qazaqy tazy álemde burynnan moıyndalǵan tuqymdarmen baq synap, tórtinshi oryn aldy. Qarsylastarymyzdyń deńgeıi óte joǵary, olardyń úkimetteri óz tuqymdaryn damytýǵa kópten beri kóńil bólip keledi. Al bizdiń qazaqy tazy halyqaralyq deńgeıde áli tolyq patenttelgen joq. Qazir osy baǵytta belsendi jumys istep jatyrmyz. Bizge on jyl merzim berildi. Osy ýaqyt ishinde tuqymymyzdy búkil álemge tanytýymyz kerek, — dedi Murat Janpeıisov.
Onyń aıtýynsha, Chelsıdiń jetistigi jeke jeńis emes, búkil qazaq halqynyń ortaq qýanyshy.
— Bul tek meniń ıtim emes, bul búkil qazaq halqynyń ıti. Ony tek ózimdiki dep aıta almaımyn. Men ony búkil qazaq halqynyń tazysy dep daıyndadym. Osy jeńiske qatty qýanyshtymyn. Bul — Qazaq eliniń qýanyshy. Alda taǵy da jarystar bolsa, mindetti túrde qatysamyz, — dep túıindedi ol.
Eske sala keteıik, 2–7 maýsym aralyǵynda Italııanyń Bolonıa qalasynda álemdegi eń bedeldi kınologııalyq forýmdardyń biri — World Dog Show 2026 kórmesi ótti. Oǵan 2024 jyly Halyqaralyq kınologııalyq federatsııadan (FCI) aldyn ala moıyndaý alǵan ulttyq tuqym — qazaqy tazy qatysty. Atap aıtqanda, Chelsı álem boıynsha jas tazylar arasynda tórtinshi oryn alyp, qazaqy tazy tuqymy ókilderi arasyndaǵy úzdik jas tóbet atandy.
