Álemdi tańǵaldyrǵan 10 jetistik: bıylǵy Gınnes rekordtary

ASTANA. KAZINFORM — Kıim-keshek jaıyp úırengen labradordan bastap, dınozavr kostıýmin kıgen 800-den astam adamǵa deıin. 2026 jyl erekshe ári tańǵalarlyq álemdik rekordtarǵa toly boldy. 19 qarashada atap ótiletin Dúnıejúzilik Gınnes rekordtar kitaby kúnine oraı Kazinform tilshisi bıyl tirkelgen eń qyzyqty on jetistikti nazarǵa usyndy.

Álemdi tańǵaldyrǵan 10 jetistik: bıylǵy Gınnes rekordtary
Foto: Canva / Ralına Djakısheva

AQSh-taǵy Djava esimdi qara labradordyń ózgeshe qabileti bar. Ol kıimderdi qystyrǵyshtardyń kómegimen jipke ilip, jaıyp bere alady.

Kıim jaıatyn labrador
Foto: Guinness World Records

21 naýryzda Mıssýrı shtatynyń Kanzas-Sıtı qalasynda Djava nebári bir mınýt ishinde kıim jibine segiz qystyrǵysh qadap, álemdik rekord ornatty. Ol úshin ıt ár qystyrǵyshty tisimen alyp, aýzyn ashyp, jipke durys ornalastyryp, jerge túsirmeı bosatýy kerek bolǵan.

Ittiń ıesi Lıza Rıkards kóp jyldan beri janýarlardy úıretýmen aınalysady. Bir qyzyǵy, Djavadan bólek, onyń anasy men ájesi de kómekshi ıtter retinde arnaıy daıyndyqtan ótken.

6 myńǵa jýyq shulyq juby kir jýǵysh mashınalarǵa tústi

Anglııanyń Chorley FC fýtbol klýby men Currys elektronıka dúkender jelisi erekshe álemdik rekord ornatýǵa bel býdy.

19 shildede fýtbol alańyna 21 kir jýǵysh mashına qoıylyp, qatysýshylarǵa shıyrshyqtap oralǵan shulyq juptaryn olardyń ishine dáldep tebý usynyldy.

Bir saǵat ishinde oıynshylar kir jýǵysh mashınalarǵa 5 956 jup shulyq túsirip, Gınnes rekordtar kitabyna endi.

Bul jarystyń qaıyrymdylyq maqsaty da boldy. Uıymdastyrýshylar Daýn sındromy bar adamdar men olardyń otbasylaryna qoldaý kórsetetin jergilikti uıymǵa qarajat jınady.

24 sekýndta eki munara turǵyzdy

12 tamyzda Laý Long Tıng eki qolyna taıaqsha ustap, árqaısysynda on oıyn súıegi bar eki munarany nebári 24,52 sekýndta turǵyzdy.

Shamamen 30 jastaǵy oqytýshy bul jetistigi arqyly shákirtterine tabandylyq, shyǵarmashylyq kózqaras jáne súıikti isine degen qulshynys adamdy erekshe nátıjelerge jetkizetinin kórsetkisi kelgen.

Qolymen turyp, 75 mınýttan astam ýaqyt shydady

Kópshilik úshin qolmen tik turýdyń ózin birneshe sekýnd boıy saqtaý ońaı emes. Alaıda Kolýmbııa sportshysy Nestor Santıago Gonsales Valero bul qalypta bir saǵattan astam ýaqyt tura aldy.

Qolymen turyp, 75 mınýttan astam ýaqyt shydady
Foto: Guinness World Records

2 tamyzda Bogota qalasynda ótken rekordtyq áreket kezinde ol qolymen 1 saǵat 15 mınýt 13 sekýnd boıy tik turdy.

Tepe-teńdikti saqtaý úshin sportshy dene salmaǵyn mezgil-mezgil bir qolyna aýystyryp otyrǵan. Osylaısha ol aldyńǵy rekordtyq kórsetkishten 5 mınýt 10 sekýndqa asyp tústi.

Dınozavr kostıýmin kıgen 804 adam

28 tamyzda AQSh-tyń ıÝta shtatyndaǵy Vernal qalasynyń kóshelerine tırannozavrdan bastap trıtseratopsqa deıingi túrli dınozavrlardyń kostıýmin kıgen 804 adam jınaldy.

Osylaısha, dınozavr kostıýmin kıgen adamdardyń eń kóp jınalýy boıynsha jańa álemdik rekord tirkeldi.

Dınozavr kostıýmin kıgen 804 adam
Foto: Guinness World Records

Qala turǵyndary 2025 jyly da osyndaı rekord ornatýǵa árekettengenimen, qajetti qatysýshylar sanyn jınaı almaǵan edi. Bıyl olar bul bastamany qaıta qolǵa alyp, maqsatyna jetti.

Іs-sharanyń qaıyrymdylyq maqsaty da boldy. 804 «dınozavr» onkologııalyq aýrýlarmen kúresip júrgen adamdardy qoldaý úshin bir mezette qatty aqyryp, erekshe aktsııa ótkizdi.

Devıd Attenboronyń 11 myń asqabaq pen kádiden jasalǵan portreti

Ulybrıtanııalyq otbasy álemge tanymal tabıǵat zertteýshileriniń biri Devıd Attenboronyń 100 jyldyq mereıtoıyn erekshe tásilmen atap ótýdi uıǵardy. Olar onyń portretin 11 myń asqabaq pen kádiden jasady.

Gempshır graftyǵyndaǵy Sunnyfields fermasynda Nelsondar otbasy baqamen birge beınelengen alyp portret qurastyrdy. Mozaıkany jasaý úshin tabıǵı tústeri ártúrli kókónister paıdalanyldy.

Asqabaq
Foto: Guinness World Records

Kompozıtsııanyń jalpy aýmaǵy 218,19 sharshy metrdi qurady. 22 qyrkúıekte bul jetistik Gınnes rekordtar kitabyna resmı túrde tirkeldi.

Aıta keteıik, Nelsondar otbasy mundaı erekshe týyndyny alǵash ret jasap otyrǵan joq. Buǵan deıin olar rok-mýzyka ańyzy Ozzı Osbornnyń alyp portretin de asqabaqtardan qurastyrǵan.

Bir mınýtta 48 marmelad aıýyn jedi

Balalyq armany men marmelad aıýlaryna degen súıispenshiligi 38 jastaǵy amerıkalyq veterınar Mettıý Paýerske álemdik rekord ornatýǵa kómektesti.

4 sáýirde Massachýsets shtatynyń Norýell qalasynda ol tek kokteılge arnalǵan istiksheni paıdalanyp, bir mınýtta 48 marmelad aıýyn jedi.

Osylaısha, 2024 jyly avstrııalyq Volfgang Shvarts ornatqan aldyńǵy rekordtan birden on táttige asyp tústi.

Bul synaqqa daıyndyq tek táttige degen súıispenshilikpen shektelmedi. Paýers ártúrli marmelad óndirýshileriniń ónimderi men dámderin synap, qaısysyn jyldam jeýge yńǵaıly ekenin anyqtaǵan. Aqyrynda Albanese brendiniń ónimin tańdap, sońǵy on táttini ýaqytqa jeýdi arnaıy jattyqtyrǵan.

Bir mınýtta 48 marmelad aıýyn jedi
Foto: Guinness World Records

Daıyndyq kezinde onyń eń úzdik nátıjesi nebári 36 dana bolǵan. Alaıda resmı rekord ornatý kezinde ol 48 marmelad aıýyn jep úlgerdi.

Paýers bala kezinen Gınnes rekordtar kitabyna enýdi armandaǵan. Onyń jetistigine alǵashqylardyń biri bolyp úsh uly qýanysh bildirdi.

Salmaǵy 1,4 tonnadan asatyn Helloýın asqabaǵy

AQSh-ta Helloýın merekesine arnap ósirilgen alyp asqabaqtyń úlkendigi sonshalyq, odan dástúrli merekelik sham oıyp jasalǵannan keıin de salmaǵy aıtarlyqtaı azaımaǵan.

Alyp kókónisti Rod-Aılend shtatynda baıqaýlarǵa arnap asqabaq ósirýmen aınalysatyn fermer Ron Ýolles ósirgen. Buryn rekord ornatqan Trevıs Gındjerdiń jetekshiligimen úsh sheber odan Helloýınniń dástúrli asqabaq shamyn – djek-fonar jasap shyǵardy.

27 qazanda Massachýsets shtatynyń Salem qalasynda asqabaqtyń salmaǵy resmı túrde ólshenip, 1 431,5 keli, ıaǵnı 3 156 fýnt ekeni anyqtaldy.

Rekord Raising Cane's meıramhanalar jelisiniń negizin qalaýshy Todd Greıvstiń atyna tirkeldi. Bul Helloýın merekesine tórt kún qalǵanda júzege asty.

Qazaqstan 2 415 adamdy biriktirip, JI-agentterin jasaý boıynsha rekord ornatty

Biri asqabaqpen, endi biri dınozavr kostıýmimen nemese táttilermen rekord ornatsa, Qazaqstan jasandy ıntellekt salasyndaǵy jetistigimen tarıhqa endi.

23 qyrkúıekte Astanada ótken HackAlem AI hakatonyna 21 el men 129 ýnıversıtetten 2 415 qatysýshy jınaldy.

Olarǵa belgili bir dárejede derbes jumys istep, tapsyrmalardy oryndaýǵa jáne sheshim qabyldaýǵa qabiletti baǵdarlamalyq júıeler – jasandy ıntellekt agentterin ázirleý mindeti qoıyldy.

Іs-shara agenttik jasandy ıntellekt taqyrybyna arnalǵan álemdegi eń aýqymdy hakaton retinde Gınnes rekordtar kitabyna endi.

Qazaqstan 2025 jylǵy jeltoqsanda Úndistannyń Haıdarabad qalasynda 2 089 qatysýshynyń basyn qosqan aldyńǵy rekordtan asyp tústi.

Robot Rýbık tekshesin 9,8 sekýndta jınady

Jańa Zelandııanyń tórt ınjeneri 4×4×4 ólshemdi Rýbık tekshesin erekshe jyldamdyqpen jınaı alatyn robot jasaýǵa bir jyl ýaqyt jumsaǵan.

Heıden Ýotson, Iohan Torres, Maz Kemeron jáne Kaleb Everıtt ózderi qurastyrǵan qurylǵyny tekshe qyrlarynyń tústerin anyqtaıtyn tórt kameramen jáne onyń qabattaryn aınaldyratyn drondarǵa arnalǵan joǵary jyldamdyqty qozǵaltqyshtarmen jabdyqtady.

16 qazanda Jańa Zelandııanyń Kraıstcherch qalasynda robot kúrdeli basqatyrǵyshty nebári 9,8 sekýndta jınap shyqty. Bul jetistik ınjenerler komandasyna Gınnes rekordtar kitabyna enýge múmkindik berdi.

Aıta keteıik, buǵan deıin Qazaqstan erler quramasy órt sóndirý-qutqarý sportynan álemdik rekord ornatty.

Materıaldyń túpnusqasyn aǵylshyn tilinde oqýǵa bolady.