Alem.Cloud: ulttyq sýperkompıýter resýrstary endi qoljetimdi
ASTANA. KAZINFORM — Memleket basshysynyń aýqymdy tsıfrlandyrý jónindegi tapsyrmasyn júzege asyrý aıasynda Jasandy ıntellekt jáne tsıfrlyq damý mınıstrligi ulttyq sýperkompıýterlik klaster resýrstaryn paıdalaný boıynsha ótinim berýge arnalǵan Alem.Cloud platformasyn tanystyrdy. Bul týraly Úkimet málim etti.
Alem.Cloud sýperkompıýteri álemdegi eń qýatty júıelerdiń TOP-500 reıtıngine enip, 86-oryndy ıelendi. Bul onyń óńirdegi eń iri esepteý ortalyǵy retindegi mártebesin rastaıdy.
— Alem.Cloud resýrstary endi zańdy tulǵalarǵa qoljetimdi. Atap aıtqanda, memlekettik organdar, ǵylymı jáne bilim berý uıymdary, startaptar, jeke kompanııalar, sondaı-aq Astana Hub rezıdentteri resýrstardy paıdalana alady. Jasandy ıntellekt jáne tsıfrlyq damý mınıstrligi jasandy ıntellektini damytýdyń ulttyq mindetteri men jobalardyń strategııalyq mańyzyn eskere otyryp, sýperkompıýter resýrstaryn bólý erejelerin ázirledi, — delingen habarlamada.
Sýperkompıýterdi paıdalanýdyń basym baǵyttaryna memlekettik basqarý, bilim berý, densaýlyq saqtaý, aýyl sharýashylyǵy men sý resýrstary, munaı-gaz salasy, taý-ken metallýrgııa kesheni, energetıka, geologııa jáne barlaý, kólik pen logıstıka, ónerkásip jáne qurylys, robototehnıka men drondar, kıberqaýipsizdik, sondaı-aq qarjylyq tehnologııalar kiredi.
Platforma arqyly ótinim berý úshin qoldanýshy https://alem-cloud.nitec.kz/ siltemesine ótip, qajetti resýrstardyń kólemin (GPU), CPU, RAM, SSD tańdaıdy, sondaı-aq jalǵa alý merzimin kórsetedi jáne jobanyń sıpattamasyn engizedi. Platformada qajetti konfıgýratsııany eseptep, qunyn shyǵaratyn arnaıy kalkýlıator qarastyrylǵan. Árbir ótinim zańdy tulǵanyń elektrondyq tsıfrlyq qoltańbasymen rastalady.
Ulttyq sýperkompıýter esepteý resýrstarynyń turaqty ári úzdiksiz jumysyn qamtamasyz etedi. Qyzmetter táýlik boıy qoljetimdi, derekter rezervtik kóshirmelermen qorǵalǵan, al SLA talaptarynyń saqtalýy júıeniń qoljetimdiligi men túsinikti bolýyna kepildik beredi. Bul kompanııalar men uıymdarǵa óz jobalaryn senimdi túrde josparlap, tıimdi júzege asyrýǵa kómektesedi.
TOP-500 reıtınginde 86 oryn Qazaqstannyń álemdik deńgeıde qýatty ǵylymı-tehnologııalyq ınfraqurylymǵa jáne óziniń AI-modelderin damytý úshin úlken áleýetke ıe ekendigin rastaıdy. Bul elge serpindi zertteýler júrgizýge, sondaı-aq bolashaqta tsıfrlyq qyzmetter men tehnologııalardyń eksportyn uıymdastyrýǵa múmkindik beredi.
Aıta keteıik, buǵan deıin qazaqstandyq Alem.Cloud álemdegi TOP-100 sýperkompıýter qataryna endi.