Tek eGov pen Aitu - Memorgandarǵa jeke mobıldi qosymshalar ázirleýge tyıym salynady
ASTANA. KAZINFORM – Shtab biryńǵaı tsıfrlyq ekojúıe qalyptastyrýǵa, kreatıvti ındýstrııany damytýǵa, IT-startaptar men joǵary oqý oryndaryn qoldaýǵa baǵyttalǵan birqatar sheshim qabyldady. Bul týraly Úkimettiń baspasóz qyzmeti habarlady.
Premer-mınıstr Oljas Bektenov tóraǵalyq etetin Tsıfrlyq shtab Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda qoıylǵan mindetterdi jedel ári júıeli túrde júzege asyrý boıynsha jumys júrgizýde.
Shtab biryńǵaı tsıfrlyq ekojúıe qalyptastyrýǵa, kreatıvti ındýstrııany damytýǵa, IT-startaptar men joǵary oqý oryndaryn qoldaýǵa baǵyttalǵan birqatar sheshim qabyldady.
— Memlekettik organdarǵa kelesi tapsyrmalar berildi:
— Qarjy, Ulttyq ekonomıka, Jasandy ıntellekt jáne tsıfrlyq damý mınıstrlikteri jergilikti atqarýshy organdarmen birlesip, «Astana Hub halyqaralyq IT-startaptar tehnoparki» korporatıvtik qoryn óńirlik ınnovatsııalar jáne kásipkerlik ortalyǵy retinde nyǵaıtý úshin 2025 jylǵy 10 qarashaǵa deıin aqparattyq-kommýnıkatsııalyq tehnologııalar salasyndaǵy basym qyzmet túrleriniń tizbesin keńeıtsin.
— Azamattar úshin qolaıly ári qaýipsiz tsıfrlyq orta qalyptastyrý maqsatynda memlekettik organdar men olarǵa vedomstvolyq baǵynysty uıymdar jeke mobıldi qosymshalardy ázirleýge tyıym salýy jáne olardyń tek eGov jáne Aitu platformalarynda júzege asyrylýyn qamtamasyz etýi tıis.
— Alem.cloud ulttyq sýperkompıýter ortalyǵynda esepteý resýrstaryn bólý qaǵıdalary bekitilsin, sodan keıin tıisti normatıvtik quqyqtyq akt ázirlensin. Ǵylym jáne joǵary bilim mınıstrligi qoldanystaǵy tetikter sheńberinde JOO-larǵa qoldaý kórsetýdi qamtamasyz etsin
Tsıfrlyq shtabtyń sheshimimen memlekettik organdarǵa Astana Hub IT-startaptar tehnoparki qyzmetiniń basym túrleriniń tizbesine mýltımedıa, oıyndardyń dızaınyn jasaý men basyp shyǵarý, baǵdarlamalyq qamtamasyz etýdi engizý, súıemeldeý jáne túrlendirý, kıbersport salasyndaǵy qyzmetter sııaqty tanymal baǵyttardy qosý tapsyryldy. Budan basqa, atalǵan tizbe QR rezıdenti emesterge baǵdarlamalyq qamtýdy paıdalana otyryp, bıznes-protsester aýtsorsıngi, aǵylshyn tilin oqytý sııaqty qyzmettermen tolyqtyryldy. Qyzmetter aıasyn keńeıtý Astana Hub-tyń jahandyq tehnologııalyq qoǵamdastyqty tartý ortalyǵy retindegi ustanymyn kúsheıte túsedi.
Yńǵaıly jáne qaýipsiz tsıfrlyq ortany qalyptastyrý maqsatynda barlyq memlekettik mobıldi servıster SuperApp qaǵıdaty boıynsha eGov jáne Aitu ekojúıelerine kezeń-kezeńimen biriktiriletin bolady. Integratsııa mobıldi qosymshalardyń bytyrańqylyq máselesin joıady, úderisterdi jedeldetedi jáne halyqqa memlekettik qyzmetter kórsetý sapasyn arttyrady.
Alem.cloud sýperkompıýterlik ortalyǵynyń esepteý resýrstaryn bólý erejelerin bekitý Astana Hub startaptary, ǵylymı uıymdar men ýnıversıtetter, memlekettik organdar jáne olardyń vedomstvolyq baǵynysty uıymdary, sondaı-aq sheteldik kompanııalardy qosa alǵanda, jeke sektor jobalary úshin joǵary ónimdi qýattarǵa qol jetkizýdiń naqty ári aıqyn tetigin qalyptastyrady.
Alem.cloud qýatyn paıdalanýǵa berýdiń basym baǵyttary jasandy ıntellekttiń ulttyq damý mindetterin eskere otyryp anyqtalady jáne bilim berý, densaýlyq saqtaý, aýyl sharýashylyǵy, sýmen jabdyqtaý, memlekettik basqarý, munaı-gaz salasy, taý-ken metallýrgııa kesheni, energetıka, geologııalyq barlaý, kólik jáne logıstıka, ónerkásip, qurylys, robototehnıka jáne taǵy da basqa salalardy qamtıdy.
Eske sala ketsek Tsıfrlyq shtab Prezıdent Joldaýyn oryndaý úshin birqatar sheshim qabyldaǵan edi.