Alem.ai ortalyǵynda Turk Heritage platformasy ashylady
ASTANA. KAZINFORM – Jyl sońyna deıin Astanadaǵy Alem.ai ortalyǵynda Turk Heritage atty Dúnıejúzilik túrki murasy platformasy ashylady. Bul týraly Halyqaralyq túrki mádenıeti jáne murasy qorynyń prezıdenti Aqtoty Raıymqulova aıtyp berdi.
Prezıdent Qasym-Jomart Toqaev 2026 jyldy tsıfrlandyrý jyly dep jarııalaǵan bolatyn. Túrki áleminde de bul salaǵa erekshe kóńil bólinip, qarqyndy jumys júrgizilip jatyr. Shyǵarylyp jatqan kitaptardyń barlyǵy tsıfrlyq formatta da daıyndalady. Barlyq qujattar men mádenı jádigerler tsıfrlyq nusqada qoljetimdi bolady.
– Túrki murasyn dáripteý tek kitap shyǵarýmen shektelmeıdi. Endigi maqsatymyz – tarıhı jáne ǵylymı eńbekterdi ǵylymı aınalymǵa ǵana emes, tsıfrlyq keńistikke de engizý. Osy baǵytta YouTube jelisindegi Turk Discovery arnasy jumys istep tur. Bizdiń halyqaralyq uıymnyń mindeti – barsha túrki elderiniń mádenıetin álem deńgeıinde nasıhattaý. Mysaly, bizde Culture KZ jáne e-Museum sııaqty tsıfrlyq saıttar bar. Sol jerde 100 myńnan astam jádiger tsıfrlandyrylǵan. Onyń ishinde túrli jádigerdiń 3D formatta jasalǵan nusqalary bar, – dedi A. Raıymqulova Jibek Joly telearnasynyń «Ýáde» baǵdarlamasynda.
Qor prezıdentiniń aıtýynsha, mundaı bastamalar ózge túrki memleketterinde de júzege asyrylýda. Al Qazaqstanda atalǵan jumystardy úılestirip, biregeı tsıfrlyq platformaǵa biriktirý kózdelip otyr.
– Biz Mádenıet mınıstrligi atqarǵan jumysty qaıtalamaımyz, mádenı saladaǵy tsıfrlandyrý nátıjelerin biregeı tsıfrlyq portalǵa biriktirý baǵytynda jumys istep jatyrmyz. Aıtalyq, Astanadaǵy Alem AI ortalyǵynda Turk Heritage Dúnıejúzilik túrki murasy platformasyn ázirlep jatyrmyz. Onda álemniń túkpir-túkpirinde, shetel arhıvterinde saqtaýly barlyq túrki murasynyń tsıfrlyq nusqalaryn jınaqtaımyz. Bul – bir kúndik jumys emes, degenmen jyl sońyna deıin kópshilik nazaryna usynýdy josparlap otyrmyz, – dedi A. Raıymqulova.
Bul rette dıplomattar men Syrtqy ister mınıstrliginiń jumysy óz nátıjesin kórsetken. Mysaly, Vatıkan arhıvteri kóptegen elder úshin jabyq bolsa, kelissózder nátıjesinde qazaq ǵalymdaryna esigin aıqara ashty.
– Sonyń arqasynda Altyn Orda kezeńine, Osman ımperııasyna, mámlúkter men Ámir Temir dáýirine qatysty bizge buryn belgisiz bolǵan qujattardy tsıfrlandyrý múmkindigi paıda boldy, – dedi Aqtoty Raıymqulova.
Aıta keteıik, búgin Qazaqstan men Izraıl prezıdentteri Alem.ai Halyqaralyq JI ortalyǵyna bardy.