Alem.ai halyqaralyq jasandy ıntellekt ortalyǵy bıyl ashylady

ASTANA. KAZINFORM – Astanadaǵy Qazaqstan Venture Group qory otandyq jáne Ortalyq Azııa elderiniń jasandy ıntellekt baǵytyndaǵy jobalaryna 1 mlrd dollarǵa deıin ınvestıtsııa salady.

Premer-mınıstr Oljas Bektenovtiń «Іlgerileýge bastaǵan alty jyl: Qazaqstan ornyqty damý jolynda» maqalasynda osyndaı derek aıtylady.

Úkimet basshysy keltirgen derekterge súıensek, Qazaqstan IT-qyzmetter eksportyn ulǵaıtyp qana qoımaı, Ortalyq Azııa elderi arasynda senimdi túrde kósh bastap tur.

- Balabaqshalarda «Otbasynyń tsıfrlyq kartasy», «Áleýmettik ámııan» jáne tsıfrlyq vaýcherler belsendi qoldanylady, QazaqLaw (zańnamalyq baza boıynsha kómekshi), LLM ulttyq tildik modeli jasaldy, «Bıznestiń tsıfrlyq kartasy» jáne basqa da jobalar ázirlenýde. Sońǵy bes jylda ınnovatsııalyq ónim kólemi eki eseden astam, 1,1 trıllıon teńgeden 2,4 trıllıon teńgege deıin ósti, - deıdi Oljas Bektenov.

Sondaı-aq, ol Prezıdent tapsyrmasymen jasandy zeıinniń damýyna qoldaý kórsetý úshin «Astana» halyqaralyq qarjy ortalyǵynyń bazasynda Qazaqstan Venture Group qorlarynyń venchýrlyq qory qurylǵanyn eske salady. Mundaǵy qarjylandyrýdyń maqsatty kólemi – 1 mıllıard dollar. 

- Qor Qazaqstan men Ortalyq Azııanyń ınnovatsııalyq jobalaryna basymdyq bere otyryp ınvestıtsııa salady. Bıyl elimizdiń jedel tsıfrlyq transformatsııasyna yqpal etetin Alem.ai halyqaralyq jasandy ıntellekt ortalyǵy ashylady, - dep jazady Premer-mınıstr.

Oljas Bektenov Úkimettiń aldynda tsıfrlandyrý men jasandy ıntellekt, kólik, energetıka, agroónerkásip sektory jáne adam kapıtalynyń damý áleýetin utymdy paıdalaný mindeti turǵanyn aıtady. 

- Úkimet júktelgen mindetterdi oryndaýǵa bar kúsh-jigerin salady. Kórip otyrǵanymyzdaı, sońǵy 6 jyl ishinde atqarylǵan jumys az emes, biraq alda budan da aýqymdy mindetter tur, - dep túıindegen ol maqalasyn. 

Eske salsaq, Memleket basshysy Qasym-Jomart Toqaev Ulttyq quryltaıdyń ІV otyrysynda krıptoaıyrbastaý, tsıfrlyq maınıng salalaryn yryqtandyrýdy tapsyǵan bolatyn.