Álem jáne koronavırýs: Anglııa men Germanııadaǵy karantın, Úndistan vaktsınasy
NUR-SULTAN. QazAqparat – Rojdestvodaǵy karantın Eýropadaǵy koronavırýstyń kelesi tolqynyn boldyrmaýǵa kómektese almady, al kontınenttegi eń iri elder, sonyń ishinde Germanııa men Anglııa shekteýlerdi uzartý máselesin talqylap jatyr. Osy ýaqytta Úndistan synǵa qaramastan óziniń vaktsınasyn maquldady, al katolık áleminiń kóshbasshysy Rım Papasy halyqqa úndeý jasady. Bul týraly QazAqparat BBS News saıtyna silteme jasap habarlaıdy.
Anglııa men Shotlandııada jańa shekteý sharalary bolýy múmkin
Ulybrıtanııa Eýropa boıynsha alǵashqy bolyp vaktsına egýdi bastady, biraq syrqattanýshylyq jaǵdaıy áli de órship tur, sol sebepti qosymsha shekteý sharalary engizilýi múmkin.
Premer Borıs Djonson Anglııadaǵy mektepter kanıkýldan keıin ashylmaýy múmkin ekenin aıtty. Jaqynda úkimet buǵan deıin aıtqan málimdemesine qaramastan, Londonnyń barlyq aýdanyndaǵy jáne eldiń ońtústik-shyǵys bóligindegi mektepterdiń jabylatynyn málimdedi. Bul aýmaqta epıdemıologııalyq jaǵdaı nasharlaı túsýde. Sondaı-aq, mınıstrler muǵalimder kásipodaqtarynyń búkil Anglııada shekteýlerdi uzartý týraly talaptaryn eskerýden bas tartty.
Birikken Koroldiktiń basqa bólikteri – Shotlandııa, Ýels jáne Soltústik Irlandııada erejelerdi jergilikti bılik belgileıdi.
Shotlandııanyń kóshbasshysy Nıkola Sterdjen dúısenbide shuǵyl otyrys ótetinin aıtyp, «shuǵyl málimdeme» jasaýy úshin Shotlandııa parlamentinen demalystan erte oralýdy ótindi. Bılik vırýstyń jańa túrine qarsy turýǵa bel býyp, jeksenbide turǵyndarǵa úıden shyqpaýǵa jáne óte qajet bolmasa kez kelgen baılanysqa túspeýge shaqyrdy.
Jalpy, Ulybrıtanııada besinshi kún qatarynan kúnine 50 myńnan astam adamda vırýs anyqtalýda. Vaktsına egý birneshe apta buryn bastalǵanyna jáne mıllıonǵa jýyq adam eki ekpeniń birine qol jetkizgenine qaramastan, epıdemııa azaıyp kele jatqan joq.
Ázirge olar nemis-amerıkandyq BioNTech/Pfizer vaktsınasyn qabyldap jatyr, biraq dúısenbiden bastap olar otandyq Oxford/AstraZeneca vaktsınasyn ege bastaıdy. Djonson aldaǵy úsh aıda 66 mıllıon halqy bar Brıtanııanyń ondaǵan mıllıon adamyna vaktsına egiletinin aıtty.
Germanııa lokdaýn merzimin uzartpaq
Germanııadaǵy búkilhalyqtyq shektek sharalary 10 qańtarda aıaqtalýy kerek edi, biraq onyń merzimin uzartýy múmkin. Bul týraly Reıter basylymy nemis saıasatkerleriniń málimdemelerine jáne demalys kúnderi jergilikti baspasózge sholý jasaı otyryp habarlady.
Kantsler Angela Merkel seısenbide aımaq basshylarymen kezdesedi. Osy máselege qatysty óziniń saqtyǵymen tanymal Merkel densaýlyq saqtaý mınıstri Iens Shpannyń nemisterdiń burynǵy erkin ómirine erte oralýǵa degen úmitin úzetin usynystarynan bas tartpaıtyny sózsiz.
«Koronavırýspen aýyrǵandardyń sany azaımaı tur, sol sebepti shekteý sharalaryn áli de soza túsemiz», - deıdi Iens Shpan.
Dárigerler Rojdestvo merekesinen keıin aýrýhanadaǵy tósek-orynǵa degen suranystyń qandaı bolatyny kelesi aptaǵa deıin baıqalmaıtynyn jáne jańa jyldyq merekelerdiń áserin biraz ýaqyt ótkennen keıin ǵana baǵalaýǵa bolatyndyǵyn aıtady.
Rım Papasynyń kóńili qaldy
Rım Papasy tek ózin ǵana oılap, ózgelerge qamqorlyq tanyta almaıtyn adamdardan kóńili qalyp júr.
Kitaphanada vıdeobaılanys arqyly túsirilgen jeksenbi kúngi ýaǵyzynda ol Vatıkan alańyndaǵy balkonnyń astynda jınalǵandarǵa, qysqy demalys kezinde shetelge qydyryp ketkenderge zekip tastady.
«Olar úıde qalǵandardyń jaǵdaıy, shekteý sharalary saldarynan qarajatsyz qalǵandardyń jaǵdaıy, aýyryp qalǵandardyń jaǵdaıy týraly oılaǵan joq. Olar demalys kezinde sergip, óz kóńilderin kóterip kelýdi ǵana oılady. Bul óte ókinishti jaǵdaı. 2021 jyly bizde ne kútip turǵanyn bilmeımiz, biraq qolymyzdan bir nárse keledi: bir-birimizge qamqor bola bilýimiz kerek. Ózińniń jeke basyńnyń qamyn ǵana oılaý – azǵyndyq», - deıdi ol.
Úndistan ózi shyǵarǵan vaktsınany maquldady
Úndistan otandyq COVAXIN vaktsınasyn egýdi maquldady.
Bul sheshim jeksenbi kúni shyǵaryldy. Bul sheshim halyqty tań qaldyrdy, sebebi sheneýnikter Bharat Biotech vaktsınasynyń qaýipsizdigi men tıimdiligi týraly eshbir derek jarııalaǵan joq jáne jalpy alǵanda kez kelgen suraqqa jaýap berýden bas tartty.
Bul áreket premer-mınıstr Narendra Modıdi de esh qymsyntpady. Ol Úndistandaǵy ǵylym men farmatsevtıka salasyn joǵary baǵalaıdy.
Úndistan óziniń vaktsınasy jasalǵan jáne maquldanǵan álemdegi sanaýly elderdiń biri bolǵanyna qaramastan, júzdegen mıllıon adamǵa arnalǵan keń kólemdi vaktsına egý baǵdarlamasy eń aldymen AstraZeneca brıtandyq vaktsına men Oksford ýnıversıteti jasaǵan vaktsınaǵa arnalǵan.
Bul baǵdarlamay bılik birneshe kún buryn maquldaǵan, sondyqtan halyq jaqyn kúnderi jetkiziletin vaktsınany kútip júr.
