Álem jáne Qazaqstan fýtbolynyń ańyzǵa aınalǵan oıynshylary Astanada kezdesedi

ASTANA.KAZINFORM – Qazaqstan fýtboly kúnine oraı Álem jáne Qazaqstan fýtbolynyń ańyz oıynshylary Astanada bas qosady.

Qazaqstan fýtbol federatsııasynyń habarlaýynsha, «1XLegends — Ańyzdar oıyny» 25 sáýir kúni elordadaǵy «Astana Arena» stadıonynda ótedi.

Qazaqstandyq jankúıerler Maıkon, Haver Dzanettı jáne Klarens Zeedorf syndy aty ańyzǵa aınalǵan fýtbolshylardyń oıynyn tamashalaı alady.

Qazaqstan ańyzdar quramasy sapynda Samat Smaqov, Nurbol Jumasqalıev, Davıd Lorııa bastaǵan fýtbol sańlaqtary alańǵa shyǵady.

Aıta keterligi, atalǵan fýtbol merekesi Ortalyq Azııada ótetin álemdik týrdyń alǵashqy oıyny bolmaq.

«Ańyzdar oıyny» Qazaqstan fýtbol federatsııasynyń qoldaýymen uıymdastyrylyp otyr.

Buǵan deıin habarlaǵanymyzdaı, fýtboldan ulttyq qurama bas bapkeriniń mindetin atqarýshy Álı Álıev naýryzda ótetin ÁCh-2026 irikteý kezeńindegi Ýels (22 naýryz) jáne Lıhtenshteınmen (25 naýryz) oıyndarǵa shaqyrylǵan fýtbolshylardyń keńeıtilgen tizimin jarııalady.