Álem jáne Azııa rekordy: Qazaqstan stend atýdan Azııa chempıonatynda kósh bastady

ASTANA. KAZINFORM – Qatar astanasy Doha qalasynda stend atýdan eresekter men jastar arasyndaǵy Azııa chempıonaty máresine jetti. Sary qurlyq birinshiligine Azııanyń 17 elinen 200-ge jýyq sportshy qatysyp, mergendik sheberlikterin sarapqa saldy.

Atalǵan jarysta Qazaqstan ulttyq quramasynyń 41 sportshysy baq synady. Chempıonat qorytyndysy boıynsha qazaqstandyq mergender 14 medal (5 altyn, 4 kúmis, 5 qola) jeńip alyp, jalpykomandalyq esepte birinshi orynǵa shyqty.

Ekinshi oryndy jarys qojaıyny Qatar quramasy (8 medal) ıelense, úzdik úshtikti Kýveıt sportshylary (7 medal) túıindedi.

Jarys barysynda qazaqstandyq sportshylar úsh álemdik jáne úsh Azııa rekordyn jańartty. Bul kórsetkishterge Edýard Eşenko, Adel Sadaqbaeva jáne Eleonora Ibragımova qol jetkizdi.

Altyn medaldi Adel Sadaqbaeva, Qazaqstan áıelder quramasy (Adel Sadaqbaeva, Olga Haılova, Ásem Orynbaı), Qazaqstan erler quramasy (Maksım Pochıvalov, Vladıslav Zavodılenko, Artem Revkov), sondaı-aq áıelder quramasy (Eleonora Ibragımova, Anastasııa Prılepına, Nargıza Sarmanova) men erler quramasy (Denıs Krıvenko, Anton Belskıı, Egor Tsarev) jeńip aldy.

Kúmis júldeni Edýard Eşenko, Maksım Pochıvalov, Maksım Bedarev jáne Eleonora Ibragımova enshilese, qola medal Olga Haılovaǵa, Qazaqstan erler quramasyna (Ratmır Enıkeev, Edýard Eşenko, Ilıa Penkov), Qazaqstan aralas quramasyna (Edýard Eşenko, Ásem Orynbaı), Vladıslav Zavodılenko men Denıs Krıvenkoǵa buıyrdy.

Osylaısha, qazaqstandyq mergender joǵary nátıje kórsetip, elimizdiń stend atý sportyndaǵy áleýetin dáleldep, Qazaqstandy Azııadaǵy kóshbasshy elderdiń qataryna qosty.

Aıta keteıik, qazirgi tańda Qazaqstan Respýblıkasynyń sporttyq atý federatsııasyn QR Bas prokýrory Berik Asylov basqarady.

Eske salaıyq, Qazaqstan jasóspirimder quramasy short-trekten Qytaıdaǵy týrnırde tórt medal jeńip aldy.