Álem toǵyzqumalaqqa qumartyp otyr
ASTANA. QazAqparat - Álem toǵyzqumalaqqa qumartyp otyr. Qazaqtyń ulttyq zııatkerlik oıyny álemdik portaldarda tanymaldyǵy jaǵynan alǵa shyǵyp, ınternet arqyly júzden astam elde oınalýda. Bul týraly jaqynda Qytaıdan qazaqtyń jańa zııatkerlik oıynymen tanysyp qaıtqan Dúnıejúzilik toǵyzqumalaq qaýymdastyǵynyń bas hatshysy, Toǵyzqumalaqtan QR Eńbek sińirgen jattyqtyrýshysy Maqsat Shotaev aıtty, dep jazady «Aıqyn» gazeti.
Onyń aıtýynsha, qazirgi kezde toǵyzqumalaqqa tek Qytaıda ǵana emes, dúnıejúzinde de qyzyǵýshylyq artyp otyr. Ulttyq oıynnyń zııatkerlik qasıetteri rýhanı muramyzdyń tanymaldylyǵyn arttyrýda. Sondaı-aq toǵyzqumalaqtyń jeke tulǵanyń ozyq qasıetterin qalyptastyrýdaǵy orny erekshe. Sondyqtan bolar, ınternet keńistigindegi iggamecenter.com saıtynda toǵyzqumalaq tanymal 145 oıynnyń arasynda birinshi orynda tur.
Al Qytaıdaǵy semınar Úrimshi jáne Altaı qalasynda ótip, oǵan Shyńjań qazaq mádenıet qoǵamy basshylyq jasady.
«Jalpy, toǵyzqumalaqty mektep baǵdarlamasyna engizý máselesi tek Qytaıda ǵana emes, Mońǵolııa, Reseı, Qyrǵyzstanda da kóterilýde. Tipti Túrkııada da birqatar túrik janashyrlary ulttyq oıyndy mektep baǵdarlamasyna engizýdiń jobasyn jasaýda. Sondaı-aq zııatkerlik muramyzdy Eýropada damytyp otyrǵan birden-bir memleket - Chehııada mektep oqýshylarynyń arasynda jarystar ótkizilýde.
Bıylǵy jyly ulttyq oıyndar boıynsha Bishkekte І «Uly Dala oıyndary» ótkizildi. Bul báseke kezinde onǵa jýyq ulttyq sport oıyndary, onyń ishinde jekpe-jek, asyq, toǵyzqumalaq, kúres, kókpar, qyz qýý, báıge jáne taǵy basqa oıyndardan saıystar ótti. ıAǵnı biz ulttyq oıyndar olımpıadasyn ótkizip úlgerdik. Endigi mejemiz - álemdik olımpıadalarǵa ulttyq oıyndarymyzdy engizý»,- deıdi M. Shotaev.
