Álem romanstary saıysynda reseılik ónerpaz Abaıdyń ánin shyrqap, jeńiske jetti
ASTANA. QazAqparat - Máskeýde ótken álem romanstary saıysynda uly aqyn Abaıdyń "Aıttym sálem, qalamqas" atty týyndysy qoıyldy. Romansty Reseıdiń sahna tórinde aıtqan Máskeý Memlekettik balalar mýzykalyq teatrynyń solısi Denıs Boldov pen Krasnoıarsk ólkesi atynan qatysqan Sevastıan Martynıýk bul romansty aqynnyń 170 jyldyǵy qurmetine arnap shyrqaǵandyqtaryn aıtty.
Osylaısha, «Aıttym sálem, qalamqastaǵy» ǵashyq jigittiń kóńili, ondaǵy sezimniń sulýlyǵy, joldaǵan ystyq sálemi bul joly Máskeýdiń tórinde tyńdarmanǵa án bolyp usynyldy. Kórermen aqyn Abaıdyń jan dúnıesine, shyǵarmashylyǵyna úńilýip, rııasyz qurmet, yqylasyn bildirdi.
Aqtyq synda qazaq qalamgeri Abaıdyń ǵumyrly jyryna jan bitirgen baıqaý qatysýshylary nazardan tys qalmady. "Aıttym sálem, qalamqas" dep Máskeýdiń tórin ánmen terbegen 25 jastaǵy úmitker Denıs Boldov úshinshi oryndy, al Krasnoıarsk ólkesinen qatysqan 21 jastaǵy stýdent Sevastıan Martynıýk birinshi oryndy jeńip aldy. Álem romanstary baıqaýynyń uıymdastyrý alqasy endi Abaıdyń "Aıttym sálem, qalamqas" shyǵarmasyn saıystyń altyn-qoryna engizýdi uıǵardy.
Júldeni tabystaý mártebesi bizdiń óńirdiń ókilderine buıyryp, álemniń 15 elinen, Reseıdiń 62 qalasynan qatysqan saıysta jeńimpazdarǵa júldeni oblystyq mádenıet basqarmasynyń basshysy K.Aıdarbekova tapsyrdy.
Aıta óteıik, halyqaralyq jas romans oryndaýshylarynyń baıqaýy bıyl Máskeýde HІH ret uıymdastyryldy. Oǵan álemniń 438 vokal oryndaýshylary joldama alǵan. Aıtýly óner baıqaýynda Reseıdiń Eńbek sińirgen óner qaıratkeri Galına Preobrajenskaıa qazaq romansyna degen erekshe qurmetin jetkizdi, dep habarlady OQO ákiminiń baspasóz qyzmeti.
