Álem rekordyn jańartty: Sofııa Shýljenko Delıde 2 altyn medal jeńip aldy

ASTANA. KAZINFORM — Nysana kózdeýden Úndistan astanasy Delıde ótip jatqan Azııa chempıonatynda Ulttyq qurama qorjynyna 2 altyn medal tústi, dep habarlaıdy Týrızm jáne sport mınıstrliginiń baspasóz qyzmeti.

Áıelder arasynda 3 pozıtsııada 50 metrden pnevmatıkalyq vıntovkamen nysana kózdeýde jekeleı synda Sofııa Shýljenko jeńimpaz atandy.

— Ol úzdik 8 mergen iriktelgen fınalda 358.2 upaı jınap, rekord jańartty. Endi otandasymyz — osy jattyǵýda eresekter jáne jasóspirimder sanatynda álem men Azııa rekordynyń ıesi, — delingen habarlamada.

Munda kúmis pen qola Úndistan sportshylarynyń enshisinde. Ulttyq qurama sportshylary — Sofııa Shýljenko, Arına Malınovskaıa men Elızaveta Bezrýkova aqtyq synda óner kórsetip, jalpy esepte 1-oryn aldy.

Osylaısha, bıylǵy qurlyq dodasynda áıelder komandasy tolyq basymdyq kórsetti. Olardyń jalpy kórsetkishi — 1760 ball.

Aıta keteıik, báseke 3 jas sanatynda (eresekter, jastar, jasóspirimder) ótip jatyr. Bıyl Delı qalasynda qurlyqtaǵy 20 elden jınalǵan 320 sportshy júldege talasady. Qazaqstan quramasy sapynda 3 jas sanatynda 47 mergen attandy. Qazaqstan eresekter quramasynyń bas bapkeri — Olga Dovgýn. Sary qurlyq básekesi 13 aqpanda máresine jetedi.

Osydan buryn Denıs Evseev Úndistandaǵy týrnırde sensatsııa jasaǵanyn jazǵanbyz.