«Álem Nazarbaev siltegen jolǵa báribir túsedi» - respýblıkalyq basylymdarǵa sholý

«Qazaq eliniń azmattary bórkin aspanǵa atar jaı bar. Qazaqstan EQYU Tóraǵalyǵy tizginine ıe boldy! Afınyda ótken EQYU-nyń mınıstrler kezdesýinde mynadaı mazmundaǵy deklaratsııa qabyldandy: «Biz EQYU-ǵa qatysýshy memleketter arasynda Ortalyq Azııada birinshi bolyp Qazaqstannyń 2010 jyly EQYU Tóraǵasy bolýyn qup kóremiz. Biz Qazaqstannyń 2010 jyly EQYU sammıtin  ótkizý týraly usynysyn ońynan qabyldaımyz. Biz mundaı mártebeli jıynnyń mańyzy men mazmunyna saı tıisti daıyndyq jasaýdyń qajettiligine nazar aýdaramyz. Biz óz sheshimimizdi negizdeý úshin EQYU-nyń kún tártibine progress dárejesin anyqtaý maqsatynda Turaqty Keńeske konsýltatsııalar ótkizýdi tapsyramyz», dep jazady «Aıqyn» gazeti. Basylymnyń jazýynsha, osy aptada Afıny qalasynda EQYU-ǵa múshe memleketterdiń 17-shi otyrysy bastalǵan. Oǵan Qazaqstan delegatsııasyn Syrtqy ister mınıstri - Memlekettik hatshy Qanat Saýdabaev bastap barǵan. «Tóraǵalyq Qazaqstanda» degen taqyryppen berilgen maqalada Q.Saýdabaevtyń «Eýropalyq rejımde jaı qarýlarǵa baqylaý jasaý jáne senim men qaýipsizdik sharalarynyń saqtalýyn biz qoldaımyz. Barlyq memleketterdiń búginde tuıyqqa tirelgen  jaǵdaıdy eńserý úshin jumylatynyna senimdimiz» degen sózi keltirilgen. 

Osy basylymda jarııalanǵan kelesi maqala «Bul - bizdiń ortaq tabysymyz» degen taqyryppen berilgen. Onda qazaq eliniń bastamasymen BUU 2010 jyldy «Mádenıetterdiń jaqyndasýynyń halyqaralyq jyly» dep jarııalap, arnaıy rezolıýtsııa qabyldaǵany, Álemdik jáne dástúrli dinder kóshbasshylarynyń kezekti sezi 2012 jyly Astanada ótetindigi aıtylǵan. Basylymnyń jazýynsha, bul jańalyqtardy keshe Astanada ashylǵan osy sez hatshylyǵynyń ІH otyrysynda Senat Tóraǵasy Qasym-Jomart Toqaev jarııa etken.

«Aıqyn» gazetinde jaryq kórgen taǵy bir maqala «Álem Nazarbaev siltegen jolǵa báribir túsedi» degen taqyryppen berilgen. Jarııalanymǵa aǵymdaǵy jyly jaryq kórgen Memleket basshysynyń «Besinshi jol» atty maqalasy ózek bolǵan. «Biz osy maqalada «Elbasymyz CDR júıesin nelikten «ǵumyry qysqa dep atady?» degen suraqqa jaýap bermekpiz», dep jazady basylym.   Basylymnyń bergen jaýabyn búgingi sanynan egjeı-tegjeıli oqı alasyzdar.

«Koreıler Qazaqstandy Baıqońyr aılaǵy arqyly tanıdy». Osy taqyryppen «Nur Astana» gazetinde jaryq kórgen suhbat Seýl qalasynda  10 jylǵa jýyq turyp jatqan Ǵalııa Álimovamen arada órbigen. Ekeýara áńgime barysynda ol «alǵash Ońtústik Koreıaǵa kelgen kezde «Qazaqstan» degende kópshiligi tańyrqap qalatyn. Qazir tanı bastady. Tipti Qazaqstannyń munaıy, gazy jáne «Baıqońyr» atty ǵarysh aılaǵy bar ekenin atap beretinder de bar», depti.

Osy basylymda jaryq kórgen kelesi maqala «Jarapazanshylar jarysyna» hosh keldińiz!» degen taqyryppen jarııalanǵan. «Qazaq ánshileriniń abyroı-bedeliniń basty barometri toı desek qatelespeımiz. Toı-tomalaqqa qaı ánshi kóp shaqyrylsa, sonyń áni elge jetimdi, sózi ótimdi, ózi tanymal sanalady. Alaıda osy toıshylyqtyń ónerdi órletýge septigi bar deý qıyn. Kerisinshe, qazaq ánshileriniń túbine toı jetip júrmegeı», dep jazady «Nur Astana» basylymy.

«Jas urpaqtyń boıynda Otanǵa degen ystyq súıispenshilikti qalyptastyrý - qasıetti borysh. «Nur Otan» HDP Ortalyq apparatynda bas qosqan aýǵandyq ardagerler aýzynan osy taqilettes sózder jıi aıtyldy. Olar Ortalyq Azııa elderiniń, Baltyq, Reseı, jáne Qazaqstan ınternatsıonalıst-jaýyngerler uıymdarynyń forýmyna jınalǵan  bolatyn», dep jazady «Nur Astana» gazeti. Atalǵan jaı tóńiregindegi tolyq maǵlumatty basylymnyń búgingi nómirinde jaryq kórgen «Qaharmandar rýhyna taǵzym» degen maqaladan oqýǵa bolady.

Osydan eki kún buryn elordanyń Aqorda alańynda ornalasqan Jańa jyldyq bas shyrshanyń shamyn Memleket basshysy Nursultan Nazarbaev jaqqan bolatyn. Osyǵan oraı «Astana aqshamy» gazetinde «Shyrsha nuryn shashady» degen taqyryppen maqala jaryq kórdi. Basylymnyń jazýynsha, 30 metrlik bas shyrshany bezendirýge 1,5 myńǵa jýyq oıynshyq pen jaryq dıody, 2 shaqyrymdaı storboskoptar, pleılaıt jáne beltlaıttar paıdalanylǵan.

«Astana aqshamy» basylymnyń aıqara betinde «Synshyldyq saryn, parasatty paıym» atty maqala jaryq kórdi. Kólemdi maqala Qazastannyń halyq jazýshysy, senator Ábish Kekilbaevtyń 70 jyldyq mereıtoıyna oraı basylǵan. Sonymen qatar birqatar qalamgerlerdiń pikirleri qosa jarııalanǵan.

«Astanada «Paryz» bıznestiń áleýmettik jaýapkershiligi boıynsha ekinshi konkýrstyń qorytyndysy shyǵaryldy», dep jazady «Kazahstanskaıa pravda» gazeti. Keshe QR Prezıdenti Nursultan Nazarbaev «Paryz» bıznestiń áleýmettik jaýapkershiligi syılyǵyn tapsyrý rásimine qatysty. Bul syılyqty Elbasy ótken jyly qańtarda Jezqazǵanda ótken Bıznestiń áleýmettik jaýapkershiligi forýmynda taǵaıyndaǵan bolatyn. Basylymnyń jazýynsha, elimizdiń 28 kásiporyny laýreat dep tanylyp, kúmis, altyn, qola nagradalarmen marapattalǵan.

«Izvestııa-Kazahstan» basylymnyń habarlaýynsha, aǵymdaǵy jyly bul baıqaýǵa elimizdiń 320-dan astam kásiporyny qatysqan. Gran-prı ıegeri bolyp «Torǵaı-Petrolıým» munaıgaz óndirý kompanııasy tanylǵan.

Atalǵan jaıtqa oraı «Aıqyn», «Lıter», «Ekspress-K» basylymdarynda da maqalalar jarııalanǵan.

«Ekspress-K» basylymynyń jazýynsha, jeltoqsannyń 1-inen bastap QR Prezıdentiniń Baıqońyr keshenindegi arnaýly ókili bolyp Qyzylorda oblysy ákiminiń orynbasary Sábıt Qojametov taǵaıyndalǵan. Sonymen qatar ol Baıqońyr aýmaǵyna kiretin  Aqaı aýyldyq okrýgi men Tóretam eldimekeniniń damýy men qyzmetin úılestiretin bolady. 

 «Sútti Sıngapýrdan ákeletin jaǵdaıdamyz». «Ekonomıka» gazetiniń búgingi sanynda osy taqyryppen maqala jaryq kórdi. Onda shaǵyn aýyldyń kúıbiń tirshiligin sýretteı kele, «Qazaqstanda sút ónimderin óńdeıtin 250 shaǵyn zaýyt bar eken. Olardyń jalpy qýattylyǵy  kúnine 5-50  tonna aralyǵynda. Elimizde halyqtyń suranysyn tolyq ótemese de, jartylaı óteýge múmkinshilik joq emes, bar. Biraq sút elimizde qaıta óńdeýden az mólsherde ótedi eken. 2008 jyly el ishinde óndirilgen ónimniń 31,6 paıyzy ǵana qaıta óńdelipti. Bul 2007 jylǵy kórsetkishke qaraǵanda, 1,4 paıyzǵa tómen eken. Máselen, ótken jyly 31 paıyz sary maı ımporttalǵan. Іrimshiktiń 61,3 paıyzy - sheteldiki. Qoıýlatylǵan sút pen qaımaqtyń 85 paıyzy elge syrttan tasymaldanady», deıdi avtor.

 Osy basylymda  Pavlodar oblysynyń ákimi Baqytjan Saǵyntaevpen aradaǵy suhbat jaryq kóripti. «Búgingi kúni ónerkásiptik óndiristiń kórsetkishteri artýda. Jyl sońyna deıin biz ótken jyldyń deńgeıin baǵyndyramyz dep boljap otyrmyz. Ústimizdegi jyldyń toǵyz aıynda ónerkásiptik óndiris kóleminiń kórsetkishteri 87,8 paıyzǵa artty. Birqatar iri ınvestıtsııalyq jobalar iske asyryldy. Jyl basynan beri bizde 13 ındýstrıaldy jobalar qolǵa alynǵan bolsa, solardyń 11-in iske qostyq. Jyl sońyna deıin taǵy 2 joba jolǵa qoıylady.  Olar - Aqsý ferroqorytpa zavodyndaǵy aglomeratsııalyq tseh jáne Pavlodar qalasyndaǵy suıyq sabyn shyǵarý tsehy. Tutastaı alǵanda, qazirgi ýaqytta oblystyń jalpy jaǵdaıy jaqsy, alańdatarlyq másele joq. Áleýmettik kórsetkishter de jaqsardy. Oblysta baǵany negizsiz kóterýge jol berilgen joq. Óńirde az qamtylǵan azamattardyń sany 31 paıyzǵa qysqardy. Eń bastysy - biz jumyssyzdyq deńgeıin qatań baqylaýǵa alyp, jumyssyzdar sanynyń ósýine jol bermedik», deıdi ákim «Ekonomıkany eseleı otyryp, halyqtyń ál-aýqatyn odan ári arttyramyz» taqyrybymen berilgen suhbatta.