Álem moıyndaǵan K. Baıseıitovanyń esimi halyq júregi men jadynda máńgi saqtalady - Darhan Myńbaı
ASTANA. 18 sáýir. QazAqparat - K. Baıseıitovanyń kórkem beınesi ulttyq mýzyka óneriniń maqtanyshy bolyp qala bermek. Bul týraly búgin Astanada Kúlásh Baıseıitovanyń 100 jyldyǵyna arnalǵan saltanatty sharada QR Mádenıet jáne aqparat mınıstri
Darhan Myńbaı málim etti.
«Ulttyq opera óneriniń qalyptasýy tarıhynda esimi altyn árippen jazylǵan, halqymyzdyń birtýar perzenti, qazaqtyń bulbuly atanǵan Kúlásh Baıseıitovanyń týǵanyna júz jyl tolýyna arnalǵan saltanatty kesh - elimizdiń mádenı, rýhanı ómirindegi eleýli oqıǵalardyń biri. Halyqtyń mahabbaty men qurmetine ıe bolǵan K. Baıseıitova jıyrma tórt jasynda Keńes Odaǵynyń Halyq ártisi degen joǵary ataqqa ıe boldy»,- dep toqtaldy mınıstr.
Osy oraıda D. Myńbaı qazaqtyń bulbuly álemdik, qazaq jáne orys klassıkalyq operalary repertýarlarynda somdaǵan rólderiniń gallereıasy óte baı ekenin atap ótti.
«Onyń tuńǵysh somdaǵan «Qyz-Jibek» operasyndaǵy kórkem beınesi ulttyq mýzyka óneriniń maqtanyshy bolyp qala bermek. Álem moıyndaǵan asqaq ánshiniń esimi halyq júregi men jadynda máńgilik saqtalady. Qysqa ǵumyrynda keıingi urpaqqa óshpes, ólmes úlgi-ónege bolar ǵajaıyp mura qaldyrǵan dara tulǵanyń rýhyna taǵzym etip, onyń qaıtalanbas ónerin nasıhattaý maqsatynda memleket tarapynan atqarylyp jatqan jumystardy búgingi jas urpaqqa tálim-tárbıe dep esepteımiz», - dedi D. Myńbaı.
Aıta keteıik, búgin Astanadaǵy K. Baıseıitova atyndaǵy Ulttyq opera jáne balet teatrynda ánshiniń 100 jyldyǵyna oraı saltanatty kontsert ótip jatyr. Kontsertte KSRO halyq ártisi Álibek Dinishev, Qazaqstannyń halyq ártisi Nurjamal Úsenbaeva, Qazaqstannyń eńbek sińirgen ártisi Janat Baqtaı, Qazaqstannyń eńbek sińirgen qaıratkerleri Janat Shybyqbaev, Aıgúl Nııazova, Gúlzat Daýyrbaeva, Jámıla Jarqymbaeva, Mádına Basbaeva, sonymen qatar «Serper» dombyrashylar ansambli, Memlekettik «Naz» bı teatry jáne K. Baıseıitova atyndaǵy UOBT balet trýppasy men hory óner kórsetedi.
