Álem meshitterinde «jasyl» juma ýaǵyzdary jańǵyrýda
ASTANA. 19 sáýir. QazAqparat - 22 sáýire atalyp ótiletin Jer kúni qarsańynda álemdegi meshitterde qorshaǵan ortany qorǵaý men tabıǵatty aıalaý jáne ekologııa taqyryptaryn qamtıtyn juma ýaǵyzdary aıtylady. Bul jaıynda OnIslam-ǵa silteme jasap Astanadaǵy Áziret Sultan meshitiniń resmı saıty habarlady.
«Biz ǵıbadat úıleri men bilim oshaqtaryn, oqý ordalaryn jáne ıslam uıymdaryn osy jolǵy qutpany Allanyń ásem jaratylysyna arnaýǵa shaqyramyz. Sondaı-aq, adamzattyń bas aýrýyna aınalǵan ekologııanyń jaı-kúıimen musylmandardy tanystyrýǵa úndeımiz», - dep aıtylǵan tabıǵatty qorǵaý taqyrybyn qaýzaıtyn kanadalyq khaleafa.com saıtynda. Bul bastamany Mýaz Násir esimdi musylman kótergen eken.
«Mýaz Násirdiń aıtýynsha, «jasyl» qutpa musylmandarǵa oı salyp, tıisti deńgeıde ótýi kerek. Musylmandar qorshaǵan ortany kóziniń qarashyǵyndaı saqtaýy kerek. «Jasyl» qutpanyń maqsaty osyǵan saıady. «Jasyl» qutpa naýqany alǵash ret ótken jyly kanadalyq musylmandardyń bastamasymen ótken bolatyn. Soltústik Amerıka men Eýropa ımamdary Jerdi kútip ustaý jaıyndaǵy Qurannyń úkimderi men ámirlerin halyqqa jetkizgen edi sol kezde. Olardyń bul bastamasyna Taıland pen Ońtústik Afrıka Respýblıkasynyń musylmandary qoldaý bildirdi», - dep jazady muslim.kz.
Mýaz Násir adamzattyń tabıǵatqa keltirip jatqan zııany shash-etekten ekenin tilge tıek etti. «Muny elemeseń - Alla jaratqan jaratylys aldyndaǵy jaýapkershilikke nemquraıly qaraǵanyń bolyp tabylady», - dedi ol. Sodan soń, amanatqa qııanat etýdiń arty jaqsylyqpen aıaqtalmaıtynyn aıtyp, eskertý jasady.
Eske salsaq, Jer kúni jyl saıyn sáýirdiń 22-i merekelenedi. Qorshaǵan ortany qorǵaý, tabıǵatty aıalaý maqsatynda ótetin osynaý ataýly kúni túrli sharalar uıymdastyrylady.
