Álem memleketteri qandaı vaktsınany tańdady
NUR-SULTAN. QazAqparat – Álem memleketteri qandaı vaktsınany tańdady? Bul suraqqa vaktsınalaýǵa qatysty ótken lektorııde QR DSM Sanıtarııalyq-epıdemıologııalyq baqylaý komıtetiniń vaktsınaǵa kónetin ınfektsııalardy baqylaý basqarmasynyń basshysy Nurshaı Ázimbaeva jaýap berdi, dep habarlaıdy QazAqparat tilshisi.
«Kanada, AQSh, Japonııa men Ońtústik Koreıa AQSh-tyń Moderna kompanııasynyń vaktsınasyn paıdalanýda. AQSh pen Kanada, odan bólek Eýroodaq elderi, Argentına, Meksıka, Saýd Arabııasy, Bahreın elderi BioNTech/Pfizer vaktsınasyn egip bastady. Al Ulybrıtanııa, Úndistan men Argentına Oxford Biomedica – Astrazeneca kompanııasynyń vaktsınasyn tańdady. Reseıden shyǵatyn Spýtnık V vaktsınasyn Belarýs, Bolıvııa, Argentına, Aljır, Serbııa paıdalanyp jatyr. Qazirdiń ózinde reseılik vaktsına 1 mıllıon adamǵa salynyp qoıdy», - dedi Nurshaı Ázimbaeva Zoom arqyly uıymdastyrylǵan lektorııde.
Odan bólek, Qytaı jáne Birikken Arab Ámirlikteri qytaılyq vaktsınany ektirip jatyr.
«20 qańtarǵa deıin álemde 46 mln 890 myń adamǵa koronavırýsqa qarsy vaktsına egildi. Atap aıtqanda AQSh-ta - 15,7 mln adamǵa, Qytaıda - 15 mln adamǵa, Ulybrıtanııada - 5 mln adamǵa, Izraılde - 3 mln adamǵa, BAÁ-de - 2,1 mln adamǵa salyndy», - dedi ol.
