Álem kýbogy kezeńi: Sprınt saıysynda jerlesterimiz júldesiz qaldy
ASTANA. QazAqparat - Fınlıandııanyń Kontıolahtı qalasynda bıatlonnan álem kýbogynyń jetinshi kezeńi ótip jatyr, dep habarlaıdy QazAqparat.
Jarystyń ekinshi kúni áıelder arasynda 7.5 shaqyrym jáne erler arasynda 10 shaqyrymdyq sprınt saıystary ótti.
Áıelder arasynda el namysyn qorǵaǵan Galına Vıshnevskaıa 25-shi orynǵa, Alına Raıkova márege 31-shi orynǵa ıe boldy. Al Darıa Klımına saıysty 64-shi orynmen aıaqtasa, Elızaveta Belchenko 88-shi orynǵa taban tiredi.
Bul saıysta bas júldeni belarýstik bıatlonshy Darıa Domracheva jeńip alsa, kúmis júldege germanııalyq Frantsıska Hıldebrand qol jetkizdi. Úzdik úshtikke ıtalııalyq Lıza Vıttotstsı ıe boldy.
Al erler arasynda ótken 10 shaqyrymdyq sprınt saıysynda otandastarymyz arasynda eń joǵary nátıjeni Vladıslav Vıtenko kórsetti - 47-shi oryn. Roman Eremın saıysty 54-shi orynda aıaqtady. Vasılıı Podkorytov pen Maksım Braýn 90-shy jáne 95-shi orynda jaıǵasty.
Erler arasynda bas júldeni reseılik Anton Shıpýlın jeńip alsa, ekinshi oryndy latvııalyq Andreı Rastorgýev ıelendi. Al úzdik úshtikti frantsııalyq Kenten Fııon-Maıe túıindedi.
Al, búgin 10 naýryz kúni saǵat 12:40-ta arplas estafeta (sýpermıkst) jarysy bastalsa, 11 naýryz kúni 12:30-da erler arasynda 15 shaqyrym, mass-start jarysy, 15:10-da áıelder 12.5 shaqyrymdyq mass-start saıysynda óner kórsetedi.
