Álem kýboginiń Astanadaǵy kezeńine dúnıeniń tanymal konkıshileri keldi

Bedeldi jarysqa 20 elden 170-ten astam sportshy qatysady.

Álem kýbogi 8 kezeńnen turady. Onyń eń alǵashqysy bıyl 16 qarashada Gollandııanyń Herenveen qalasynda ótken bolatyn. Maýsym boıy qajetti upaılaryn túgendep alǵan sportshylar, týrnırdiń aqtyq kezeńinde Kýbokke talasatyn bolady. Sonymen qatar kezeńder barysynda úzdik atanǵan sportshylar qysqy Olımpıadaǵa jáne Álem chempıonatyna joldama alady. Sondyqtan búgingi tańda Álem kýbogi halyqaralyq jarystardyń ishinde bási joǵary doda bolyp esepteledi. El quramasynda óner kórsetetin sportshylar da osyǵan oraı Azııa chempıonatynan bas tartyp, atalmysh kýbokqa tyńǵylyqty daıyndalyp kelgen.

Maýsym basynda upaılardy jıyp alýdy oılaıtyn álemniń eń myqty konkıshileri de búginde Astanaǵa at terletip kelip otyr. Olardyń qatarynda 2010 jyldyń Olımpıada chempıony, 2006 jylǵy Olımpıada oıyndarynyń toptyq jarysynda altyn ıelengen kanadalyq spotshy qyz Krıstın Nesbıtt, 1500 metr qashyqtyqqa konkımen júgirýden 2006 jylǵy Olımpıada chempıony, álem rekordttarynyń birneshe dúrkin ıesi Sındı Klassen, komandalyq jarysta Olımpıada chempıony, 1500 metr qashyqtyqta jarysýdan álemniń eki dúrkin jeńimpazy Dennı Morrıson bar. Chehııadan jasóspirimder arasynda álem chempıony, komandalyq saıysta Álem kýboginiń ıegeri Karolına Erbanova men Olımpıada chempıony, álem jáne Eýropanyń birneshe dúrkin jeńimpazy, álem rekordsmeni Martına Sablıkova kelgen.

Sonymen qatar qazaqstandyq sportsúıer qaýym Frantsııa quramasynyń úzdigi Aleksıs Kantına, nemis qyzy Klaýdıa Pehshtaın, japondyq Erıko Ishıno, Koreıa elinen Olımpıada chempıony Sen Hýn Lı, amerıkandyq Shanı Devıs, norvegııalyq Hovard Bokko, reseılik Ekaterına Lobysheva, Olga Graf jáne Ivan Skobrev syndy dúnıeniń eń myqty konkıshileriniń jarysyn kóre alady.

Jarys 1-2 jeltoqsan kúnderi ótedi. Álem kýboginiń saıystaryn kórem deıtin kórermenderge kirý - tegin.