Álem kýbogynda qazaqstandyq boksshylar fınalda kimdermen kezdesedi
ASTANA. KAZINFORM — Qytaıdyń Gýııan qalasynda ótip jatqan álem kýbogy fınalynda qazaqstandyq boksshylardyń kimdermen kezdesetini belgili boldy.
Búgin, 21 maýsym kúni bokstan Qytaıdaǵy Álem kýbogynyń fınaldyq jekpe-jegi ótedi. Elimizdiń atynan bes bylǵary qolǵap sheberi sharshy alańǵa shyǵady.
Kúndizgi sessııa (Qazaqstan ýaqytymen 09:00)
2-jup. 54 keli. Nazym Qyzaıbaı — Sırıne Charaabı (Italııa, álem chempıonatynyń 2 márte júldegeri). Qarsylastar buryn bir-birimen ózara kezdespegen. Italııa boksshysy sáýir aıynda ǵana Fınlıandııadaǵy halyqaralyq týrnırde Jaına Shekerbekovaǵa ese jibergen edi.
3-jup. 60 keli. Vıktorııa Grafeeva — Lın ıÝı-Tın (Taıpeı, Parıj Olımpıadasynyń chempıony). Qarsylastar qazirge deıin bir-birimen judyryqtasqan joq. Taıpeı ókili Qazaqstannan Karına Ibragımovamen 4 márte jáne Nazym Qyzaıbaımen sharshy alańda jolyqqan.
6-jup. 70 keli. Abylaıhan Júsipov — Dıpak (Úndistan). Bul eki qarsylas ta qazirge deıin eshqandaı kezdsepegen. Úndistan boksshysy 2026 jyldyń basynda Ispanııadaǵy Boxam halyqaralyq týrnıriniń fınalynda Tórehan Sabyrhannan jeńilgen bolatyn.
Keshki sessııa (Qazaqstan ýaqytymen 15:30)
1-jup. 50 keli. Sanjar Táshkenbaı — Asılbek Jalılov (Ózbekstan, Azııa chempıony). Otandasymyz 2022 jyly Azııa chempıonaty jáne 2024 jyly «Strandja» týrnırinde basym túsken edi.
6-jup. 90 keliden joǵary. Aıbek Oralbaı — Nıkıta Pýtılov (Germanııa).2025 jyly Astanada ótken álem kýbogynyń fınalynda jolyǵyp, Aıbektiń mereıi ústem bolǵan.
Aıta ketsek, álem kýbogy fınalynda Ózbekstan — 7, Qytaı — 6, Qazaqstan — 5, Úndistan men Frantsııa — 4, Brazılııa — 3, Anglııa, AQSh, Italııa — 2, Taıpeı, Bolgarııa, Ázerbaıjan, Germanııa, Kanada — 1 úzdigine úmit artyp otyr.
