Álem kýbogynda altyn alǵan boksshyǵa týǵan jerinde qurmet kórsetildi
PETROPAVL. KAZINFORM – Soltústik Qazaqstan oblysynda sportshy Natalıa Bogdanovaǵa óńir basshysy Ǵaýez Nurmuhambetov 5 mln teńgeniń sertıfıkatyn tabys etti.
– Búgin óńirdiń sportsúıer qaýymy álem kýbogynyń ıegeri, belgili boksshy Natalıa Bogdanovaǵa qurmet kórsetti. Ásirese, fınaldyq jekpe-jektiń Astanada ótýi — erekshe sımvoldyq mánge ıe. Onda Natalıa aýstralııalyq qarsylasyn senimdi túrde jeńip, qazaqstandyq bokstyń joǵary deńgeıin kórsetti. Buǵan deıin de Natalıa kóp jetistikke jetken. Aıtalyq, ol – álem chempıonatynyń qola júldegeri jáne Azıada chempıony. Bul – Soltústik Qazaqstan halqy maqtan tutatyn aıtýly jeńister, - dedi Ǵaýez Nurmuhambetov.
Іs-shara kezinde boksshynyń bapkeri Dastan Kabdenov te eskerýsiz qalmady. Oǵan 1 mln teńgeniń sertıfıkaty tabys etildi.
Natalıa Bogdanova 1999 jyly dúnıege kelgen. Sportqa kesh kelgenimen, búginde tanymal boksshylardyń biri sanalady.
Otandasymyz Astanada ótken World Boxing aıasyndaǵy álem kýbogynda 70 keli salmaqta úzdik shyqty. Bıyl naýryz aıynda ótken álem chempıonatynda qola júldege qol jetkizdi.
Al, byltyr jeltoqsan aıynda Taılandtyń Chıangmaı qalasynda bokstan ótken Azııa chempıonatynda Natalıa Bogdanova altynnan alqa taqty.