Álem kýbogy: Aıbek Oralbaı men Sabyrjan Aqqalyqov fınalǵa shyqty

ASTANA. KAZINFORM - Astanada ótip jatqan World Boxing aıasyndaǵy álem kýbogynda búgin Qazaqstan quramasy sapynan taǵy eki boksshy fınalǵa joldama aldy.

Asa aýyr salmaqta Aıbek Oralbaı (90 keliden joǵary) jartylaı fınalda ázirbaıjandyq Mahammad Abýllavpen qolǵap túıistirdi.

Aıbek Oralbaı sońǵy raýndta Mahammad Abdýllaevty nokdaýnǵa túsirip úlgerdi Úsh raýnd nátıjesinde Aıbek aqtyq synǵa ótti. 

Aıta ketsek, qos boksshy buǵan deıin 2024 jyly Elorda cup týrnırinde jolyǵyp, ol kezde de Aıbek basym túsken edi.

Al Sabyrjan Aqqalyqov (75 keli) fınalǵa shyǵý úshin Úndistan ókili Nıkhıl Dýbeımen kezdesti.
Jekpe-jek teń dárejede ótip, Sabyrjan Aqqalyqov úshinshi raýndta jeńisti julyp aldy. Endi ol álem kýbogynyń altyn medali úshin kúresedi.

Aıta ketsek, qazirge deıin Alýa Balqybekova (51 keli), Nurbek Oralbaı (80 keli), Nazym Qyzaıbaı (48 keli), Vıktorııa Grafeeva (60 keli), Natalıa Bogdanova (70 keli), Sanjar Táshkenbaı (50 keli), Bekzad Nurdáýletov (85 keli), Nadejda Rıabets (75 keli) altyn júldeni sarapqa salýǵa múmkindik aldy. 

Al el quramasynan Ertýǵan Zeınýllınov (65 keli), Aıdana Zabynbekova (57 keli), Aıda Ábikeeva (65 keli) qola júldeni qanaǵat tutty.