Álem kýbogy: Aıbek Oralbaı alǵashqy qarsylasyn oısyrata jeńdi

ASTANA. KAZINFORM - Astanada ótip jatqan World Boxing aıasyndaǵy bokstan álem kýbogynda qazaqstandyq Aıbek Oralbaı (90 keliden joǵary) alǵashqy jekpe-jegin sátti ótkizdi.

Bul joly ol domınıkandyq Hose Agýstınmen judyryqtasty.

Aıbek birinshi raýndtan bastap qarsylasyna soqqy jasaýǵa múmkindik bermedi. Nátıjesinde ekinshi raýndta qarsylasyn nokdaýnǵa túsirdi.

Eki dúrkin Azııa chempıony Aıbek Oralbaı jarysty jalǵastyrýǵa múmkindik aldy.

Eske salsaq, qazirge deıin Vıktorııa Grafeeva (60 keli), Natalıa Bogdanova (70 keli), Nazym Qyzaıbaı (48 keli), Nurbek Oralbaı (80 keli), Mahmud Sabyrhan (55 keli), Serik Temirjanov (60 keli), Nadejda Rıabets (75 keli) qarsylastaryn qapy qaldyrdy.

Álem kýbogyna 30 elden 300-ge jýyq boksshy qatysyp jatyr. Bul Olımpıadalyq WORLD BOXING uıymynyń Qazaqstandaǵy alǵashqy jarysy bolyp otyr.

Álem kýbogy jyl boıyna birneshe kezeńmen ótkiziledi. Reıtıngilik saıysta ár salmaq dárejesinde jeńimpazǵa 300, ekinshi orynǵa 200, qos qola júldegerge 150 upaıdan beriledi.