Álem kýbogy: Astanadaǵy jarysta búgin qazaqstandyq bes boksshy synǵa túsedi

ASTANA. KAZINFORM - Astanada ótetin World Boxing aıasyndaǵy álem kýbogynda búgin, 30 maýsymda el quramasynan bes boksshy sharshy alańǵa shyǵady.

Aldymen qazaqstandyq ýaqytpen 14:00-de bastalatyn kúndizgi sessııada qazaqstandyq úsh bylǵary qolǵap sheberi saıysqa túsedi.

Bul jekpe-jekter «Qazsport» telearnasynan tikeleı efırde kórsetiledi.

Ekinshi jupta áıelder arasynda Nazym Qyzaıbaı (48 keli) 1/8 fınalda kanadalyq Prııanho Dıllon, tórtinshi jupta Anel Sakysh (54 keli) 1/16 fınalda germanııalyq Tatıana Obermaıermen qolǵap túıistiredi. Segizinshi jupta erlerde Abylaıhan Júsipov (70 keli) 1/8 fınalda qyrǵyzstandyq Almaz Orozbekovpen kezdesedi.

Al 19:00-de bastalatyn keshki sessııada qazaqstandyq eki boksshy sharshy alańǵa shyǵady.

Úshinshi jupta áıelderde Vıktorııa Grafeeva (60 keli) 1/8 fınalda japonııalyq Aıaka Tagýtı, besinshi jupta Natalıa Bogdanova (70 keli) ındonezııalyq Sanamacha Chaný Tokchommen synǵa túsedi.

Álem kýbogyna 30 elden 300-ge jýyq boksshy qatysady. Bul Olımpıadalyq WORLD BOXING uıymynyń Qazaqstandaǵy alǵashqy jarysy bolyp otyr. Álem kýbogy jyl boıyna birneshe kezeńmen ótkiziledi. Reıtıngilik saıysta ár salmaq dárejesinde jeńimpazǵa 300, ekinshi orynǵa 200, qos qola júldegerge 150 upaıdan beriledi.

Dúbirli doda 30 maýsym-6 shilde aralyǵynda elordadaǵy Jaqsylyq Úshkempirov atyndaǵy jekpe-jek saraıynda ótedi. Onda erler jáne áıelder quramalary júldelerdi sarapqa salady.

Eske salsaq, álem kýbogynda qazaqstandyq boksshylardyń alǵashqy qarsylastary anyqtaldy.