Álem kóshbasshylary Tramp engizgen tarıfterge qalaı qaraıdy

ASTANA. KAZINFORM — AQSh prezıdenti Donald Tramp eldiń barlyq saýda seriktesine 10 paıyzdyq baj salyǵyn engizetinin, sondaı-aq ondaǵan basqa elge baj salyǵyn arttyratynyn habarlady. Reuters Tramptyń bul saıasatyna álem kóshbasshylary ne deıtinin zerdeledi.

Japonııa premer-mınıstri Sıgerý Isıba

— Japonııa — AQSh-qa eń kóp ınvestıtsııa salatyn el, sondyqtan bizde (Vashıngton úshin) barlyq elge birkelki tarıf qoldanýdyń máni qanshalyqty durys degen suraq týyndaıdy. Biz Japonııanyń ulttyq múddesi úshin ne jaqsy ekenin qarastyrýymyz kerek. Biz eń tıimdi jaýap tabý úshin barlyq nusqany qarastyryp jatyrmyz. 

Kanada premer-mınıstri Mark Karnı

— (Tramp) Kanada men AQSh arasyndaǵy mańyzdy qatynastardy saqtap qaldy. Alaıda bolat pen alıýmınııge salynatyn baj salyǵy sııaqty, fentanıl salyǵy saqtalyp qaldy. Biz bul tarıfterge qarsy sharalar qoldaný arqyly kúresemiz, jumysshylarymyzdy qorǵaımyz jáne G7 elderindegi eń kúshti ekonomıkany quramyz.

Ońtústik Koreıa prezıdentiniń mindetin atqarýshy Han Dok Sý 

— Jahandyq saýda soǵysy shyndyqqa aınaldy. Úkimet daǵdarysty eńserý úshin barlyq resýrsty paıdalanýy kerek.

Shveıtsarııa Prezıdenti Karın Keller-Zýtter

— Federaldy keńes aldaǵy qadamdardy tez arada anyqtaıdy. Eldiń ekonomıkalyq múddeleri basymdyq, al erkin saýda — basty qundylyq bolyp qala beredi.

Italııa premer-mınıstri Djordja Melonı

— Biz AQSh-pen kelisimge kelý jáne Batysty basqa oıynshylardyń paıdasyna álsiretetin saýda soǵysyn boldyrmaý úshin qoldan kelgenniń bárin jasaımyz.

Buǵan deıin Qytaı AQSh tarıfterine baılanysty jaýap sharalaryn daıyndap jatqany habarlanǵan.