Álem kóshbasshylary pandemııaǵa daıyndyqty kúsheıtýge ýaǵdalasty
ASTANA. KAZINFORM – BUU Bas Assambleıasynyń otyrysyna qatysqan álem elderi kóshbasshylary bolashaq pandemııalarǵa daıyndyqty kúsheıtý jónindegi mindettemelerin jańartyp, indetterdiń aldyn alý, oǵan daıyndalý jáne den qoıý sharalaryna turaqty ınvestıtsııa men halyqaralyq yntymaqtastyq qajet ekenin atap ótti. Bul týraly BUU-nyń Jańalyqtar qyzmeti habarlady.
Mundaı mindettemeler BUU Bas Assambleıasynyń pandemııalardyń aldyn alý, oǵan daıyndyq jáne den qoıý máseleleri jónindegi ekinshi joǵary deńgeıdegi otyrysynda aıtyldy. Kezdesýde 2023 jyly ótken alǵashqy jıynnan bergi nátıjeler qaraldy.
Elder sońǵy úsh jylda pandemııa qaýpin anyqtaý, oǵan daıyndalý jáne den qoıýdyń jahandyq júıesin nyǵaıtý baǵytynda ilgerileý bolǵanyn atap ótti. Osy kezeńde DDU-nyń Pandemııa jónindegi kelisimi qabyldanyp, 2005 jylǵy Halyqaralyq medıtsınalyq-sanıtarııalyq erejelerge ózgerister engizildi.
Sonymen qatar epıdemııalar men pandemııalardy baqylaý, qozdyrǵyshtarmen almasý, vaktsınalar, dári-dármek pen dıagnostıkalyq quraldardy jergilikti jerde óndirý baǵytyndaǵy múmkindikter keńeıtildi.
DDU bas dırektory Tedros Adhanom Gebreıesýs qol jetkizilgen nátıjelerdi saqtap, bolashaqtaǵy densaýlyqqa tónetin qaýipterge daıyndyqty kúsheıtý úshin turaqty is-qımyl men ınvestıtsııa qajet ekenin aıtty.
Onyń málimetinshe, COVID-19 pandemııasy 2020–2023 jyldary álemde 20 mıllıonnan astam artyq ólimge sebep bolyp, jahandyq ekonomıkaǵa 10 trıllıon dollardan astam shyǵyn keltirgen.
Sondaı-aq memleketter Pandemııa jónindegi kelisimge patogenderge qol jetkizý jáne odan túsetin paıdany ádil bólý júıesin (PABS) engizetin qosymsha hattama boıynsha kelissózderdi aıaqtaý qajettigin atap ótti.
Usynylyp otyrǵan júıe pandemııalyq áleýeti bar qozdyrǵyshtarmen jedel almasýǵa, sondaı-aq sonyń nátıjesinde ázirlengen vaktsınalar, dári-dármek, dıagnostıkalyq jáne basqa da medıtsınalyq ónimderdi ádil bólýge múmkindik bermek.
Qosymsha hattamany 2027 jylǵy mamyrda ótetin Dúnıejúzilik densaýlyq saqtaý assambleıasynda qabyldaý josparlanyp otyr.
Jıynda bolashaq pandemııalardyń aldyn alý men olarǵa den qoıýda halyqaralyq yntymaqtastyqtyń, tózimdi densaýlyq saqtaý júıeleriniń jáne adam, janýarlar men qorshaǵan orta densaýlyǵyn ózara baılanystyratyn «Birtutas densaýlyq» tásiliniń mańyzy da atap ótildi.
Aıta keteıik, BUU Izraıl qonystarymen baılanysty kompanııalar tizimin jańartty.
Sondaı-aq Erdoǵan BUU minberinen álem elderin Palestınany moıyndaýǵa shaqyrǵanyn jazdyq.
