Álem qazaqtaryn toǵystyrǵan quryltaıǵa - 34 jyl
ASTANA. KAZINFORM – 1992 jylǵy 29 qyrkúıekte Almaty qalasynda Dúnıejúzi qazaqtarynyń tuńǵysh quryltaıy óz jumysyn bastady. Tarıhı jıynǵa álemniń túrli elderinen qazaq dıasporasynyń ókilderi qatysyp, sheteldegi qandastardyń ózekti máseleleri talqylandy.
Alǵashqy quryltaıdyń basty maqsaty – dúnıejúzinde ómir súrip jatqan qazaqtardy tarıhı Otany tóńiregine toptastyrý, olardyń arasyndaǵy rýhanı-mádenı baılanysty nyǵaıtý, ana tili men ulttyq salt-dástúrdi saqtaý boldy.
Quryltaı barysynda sheteldegi qazaqtardyń áleýmettik jaǵdaıy, ulttyq mádenıetti damytý, ana tilin saqtaý jáne tarıhı Otanyna oralý máselelerine erekshe nazar aýdaryldy.
Osydan keıin Dúnıejúzi qazaqtarynyń quryltaıy birneshe ret uıymdastyryldy. Ekinshi quryltaı 2002 jyly Túrkistan qalasynda, úshinshi quryltaı 2005 jyly Astanada, tórtinshi quryltaı 2011 jyly Astanada ótti.
Al besinshi Dúnıejúzi qazaqtarynyń quryltaıy 2017 jylǵy 22-25 maýsym aralyǵynda Astana qalasynda uıymdastyryldy. Onyń negizgi sharalary «EKSPO-2017» halyqaralyq mamandandyrylǵan kórmesi aıasynda ótkizildi. Quryltaıdyń ashylý saltanaty 23 maýsymda ótti.
Besinshi quryltaıǵa álemniń birqatar elderinen kelgen qazaq dıasporasynyń ókilderi qatysty. Jıyn barysynda sheteldegi qandastardyń jaǵdaıy, tarıhı Otanyna qonys aýdarý, ulttyq mádenıet pen tildi saqtaý, sondaı-aq Qazaqstan men sheteldegi qazaqtar arasyndaǵy baılanysty odan ári nyǵaıtý máseleleri qaraldy.
- Dúnıejúzi qazaqtarynyń quryltaıy – álemniń ár túkpirinde turatyn qazaqtardyń basyn qosatyn mańyzdy halyqaralyq jıyn. Onyń negizgi máni – ulttyq birlikti nyǵaıtý, tarıhı-mádenı qundylyqtardy saqtaý jáne sheteldegi qandastarmen baılanysty damytý. Ókinishke oraı sońǵy jyldary quryltaı ótkizýdiń múmkindigi bolmady. Shara aldaǵy ýaqytta jalǵasyn tabady dep úmittenemiz , - deıdi Dúnıejúzi qazaqtary qaýymdastyǵy tóraǵasynyń keńesshisi Qarlyǵash Bekpatshaqyzy.
Aıta keteıik, eki myńnan astam qandas memlekettik bilim grantyn ıelendi.
