Álem qazaqstandyq munaıǵa zárý bolyp qala beredi - «Shell» basshysy

ASTANA. QazAqparat - Álemdegi memleketter qazaqstandyq munaıǵa áli de zárý bolyp qala beredi. Astanada ótken Sheteldik ınvestorlar keńesiniń otyrysynda «Royal Dutch Shell plc» kontserniniń atqarýshy dırektory Ben van Berden osyndaı pikir bildirdi, dep habarlaıdy QazAqparat tilshisi.

«Bizge bir jaıdy eskerý kerek. «Sky» stsenarıi aıasynda ózgerister jedel bolyp jatqanymen, 2050 jylǵa deıin álem áli de bolsa qazirgi munaı men gazdyń 85 paıyzdyq óndirisine zárý bolady. Uzaq ýaqyt boıy álem burynǵysha qazaqstandyq munaı men gazdyń qajettiligin sezinedi. Álem Qashaǵan, Qarashyǵanaq ken oryndary jáne ózge de jobalar aıasynda bizdiń birlesken jumysqa qajettilikti sezineri anyq», - deıdi ol.

Ben van Berdennyń aıtýynsha, «Shell» kontserni múmkindikterdi, atap aıtqanda, bıootyndy bolsyn, elektrdi nemese sýtekti bolsyn paıdalana otyryp, álemdik birlestiktermen birge alǵa jyljı bermek.

«Qazirgi tańda Qazaqstan jańa energetıkalyq bolashaqqa qaraı baǵyt alý turǵysynda sharalardy júzege asyryp jatqanyn bilemiz. Energııanyń balamaly kózderin qoldaný boıynsha iri aýqymdaǵy jobalar aıasynda 1 gıgavattyq aýktsıon kóptegen elderdiń qyzyǵýshylyǵyn týdyryp otyr. Óziniń dıversıfıkatsııasy men tabysty túrde damýynyń arqasynda «Shell» Qazaqstanǵa ekonomıkany tıimdi túrde damytýyna kómektese alady. Bizdiń birlese otyryp, qıyndyqtardy eńserýge shamamyz jetedi», - deıdi ol.

Ben van Berden óz sózinde Qazaqstan sekildi turaqty damý jolyna túsken memleketterdiń kóp emes ekenin tilge tıek etti.

«Mine, biz búgin jedel túrde jańǵyrý máselelerin osynda talqylap jatyrmyz. Qazaqstannyń damý keleshegi úlken úmit kúttiredi. Qarqynnyń osylaı qala beretinine esh kúmánim joq», - dedi ol.

Foto: vectornews.eu