Álem halqy Ekinshi dúnıejúzilik soǵystyń aıaqtalýynyń 70 jyldyǵyn atap ótýde
ASTANA. QazAqparat - Londonda Ekinshi dúnıejúzilik soǵystyń aıaqtalýynyń 70 jyldyǵyna oraı saltanatty sharalar ótip jatyr. 1945 jyldyń 15 tamyzynda Japonııa kapıtýlıatsııa jóninde málimdegen bolatyn.
Trafalgar alańyndaǵy shirkeýde ótken sharaǵa Ulybrıtanııa hanshaıymy II Elızaveta, onyń jubaıy Fılıpp hanzada, premer-mınıstr Devıd Kemeron jáne basqa da laýazymdy tulǵalar men áskerı qyzmetshiler, tutqynda bolǵan sarbazdar, t.b. qatysty. Bul kúni soǵys kezinde maıdan alańynda qaza tapqandar men tutqynǵa túsip, qasiret keshken jandardy dostary, týǵan-týystary eske aldy.
Sondaı-aq búgin eske alý sharalary Japonııa, Qytaı, Ońtústik Koreıada ótkizildi.
Japonııa premer-mınıstri Sındzo Abe men memleket basshysy, ımperator Akıhıto, bir mınýt únsizdikpen soǵysta opat bolǵandardy eske aldy.
Ataýly data qarsańynda S. Abe Japonııanyń Ekinshi dúnıejúzilik soǵys kezindegi áreketteri úshin taǵy bir márte keshirim suraǵan bolatyn. Alaıda Qytaı men Ońtústik Koreıa bul málimdemeniń shynaıylyǵyna kúmán keltirip, buǵan qanaǵattanbaıtyndyqtaryn bildirdi.
