Álem elderinde ózindik ulttyq sıpaty joq ǵımarattar kóbeıdi
ASTANA. KAZINFORM – Qazir álemde ózindik ulttyq nemese mádenı sıpaty joq ǵımarattar kóbeıdi. Bul týraly Astana qalasy ýrbanıstıka ortalyǵynyń aǵa ýrbanısi Nurqoja Baýyrjanuly málim etti.
BIZDIÑ ORTA podkastynda mamanǵa Astanadaǵy nysandardyń arhıtektýrasynda ulttyq naqysh qanshalyqty eskerilip jatqany jóninde suraq qoıyldy.
- Endi buny Batys elderiniń stıli dep aıtýǵa kelmeıdi, sebebi qazir sol jaqta da týra osy másele kóterilip otyr. Árıne, bul salada sáýletshiler dabyl qaǵyp jatady. Buryn Qytaıǵa barsań bir stıl, arab elderinde ózgeshe bir stıl, al Eýropada basqasha bolatyn. Qazir «bet-álpetsiz sáýlet» degen termın bar, ıaǵnı ǵımaratqa qarap, ol qaı memlekettiń ulttyq naqyshynda ekenin aıta almaısyń. Sondyqtan bul nysandardy Batys elderiniń mádenıetine de uqsatýǵa kelmeıdi. Ol - qur dızaın nemese geometrııa sıpatynda, - dedi Nurqoja Baýyrjanuly.
Onyń aıtýynsha, qalanyń keıbir aýdandarynda eýropalyq stılde, ıaǵnı frantsýz nemese ıtalııalyq stılde salynǵan ǵımarattar bar.
- Keıbir adamdar sondaı úıde turǵysy kelse, biz ne isteı alamyz? Ondaı adamdar bar. Mysaly shetelge kóshkisi kelmeıdi, Astanada turǵandy qalaıdy, biraq oǵan Frantsııa stılindegi ǵımarattar unaıdy. Olar sondaı jerde turǵysy keledi, olardyń suranysy oryndalýy kerek. Sebebi suranys bar jerde, usynys ta bar degendeı. Atap aıtqanda, negizgi kóshelerde Qazaqstanda júrgenińdi sezdiretin kishi arhıtektýralyq formalar bar. Olardyq qatarynda músinder nemese basqa da bir ınteraktıvti zattar bolýy múmkin, - dedi maman.
Buǵan deıin aqtaýlyq turǵyn úıiniń kireberisin qazaqy naqyshta ásemdep, kópke úlgi kórsetkenin jazǵan edik.
