Álem elderin Qazaqstannan úlgi alýǵa shaqyramyz – Dúnıejúzilik ıslam lıgasy
Dúnıejúzilik ıslam lıgasy Bas hatshysynyń orynbasary Abdýrahman Abdýlla Ál-Zaıd álem elderin Qazaqstannan úlgi alyp, ıadrolyq qarýdan arylýǵa shaqyrdy, dep habarlaıdy Kazinform.
«Bárimizdiń basymyzdy kezekti márte qosqan osynaý zamanaýı qalada biz búkil álemde beıbitshilikti qalaıtyn nıetimizdi san márte naqtylaǵan edik. Qoǵamdyq kelisimge qol jetkizýge degen umtylysymyz bizderdiń pikir qarama-qaıshylyǵymyzdy da eńserip otyr. Jalpy adamı qundylyqtarymyzdy nyǵaıtý jáne olardy tıimdi jobalarǵa aınaldyrý úshin qazirgi zamanǵy kóptegen syn-tegeýringe qatysty kózqarasymyz ben ustanymymyzdy jaqyndastyra túsýge tıispiz», - dedi ol Álemdik jáne dástúrli dinder kóshbasshylary sezi hatshylyǵynyń HHІ otyrysynda.
Osy oraıda din qaıratkeri álemde adamdardyń ólim-jitimine sebep bolyp otyrǵan qantógisterdi toqtatýǵa úndedi.
«Biz álem elderin joıqyn qarýdan óz erkimen bas tartqan Qazaqstan Respýblıkasynan úlgi alyp, ıadrolyq áleýetterinen arylýǵa shaqyramyz. Qazaqstan qarýdyń ornyna janjaldardy sheshýdiń quraly retinde dıalog pen ózara túsinistik jolyn tańdap otyr. Sol úshin qazaq Úkimeti men halqyna shynaıy rızashylyǵymyzdy bildiremiz», - dedi Abdýrahman Abdýlla Ál-Zaıd.
