Álem elderiniń áskeri COVID-19 indetimen qalaı kúresip jatyr

Dúnıe júzinde áskerı kúshterdiń bári de medıtsına qyzmetkerlerimen birge jumylyp, qurlyqtaǵy kúshter qoǵamdaǵy zańdylyq pen tártipti qorǵap, jergilikti bılik organdaryna kómek kórsetip, kóshede dezınfektsııa júrgizedi. Áýe kúshteri azamattardy úılerine jetkizip, gýmanıtarlyq júk jetkizedi.

Qazaqstanda da Qarýly kúshter koronavırýsqa qarsy kúrestiń aldyńǵy qatarynda. Áskerıler karantındik sharalarǵa keńinen atsalysyp, kóshelerge patrýl jasaıdy, bıologııalyq qaýipsizdik bólimsheleri dezınfektsııa júrgizedi. Áskerı-kólik avıatsııasynyń kúshterimen bizdiń otandastarymyz óz Otanyna qaıtarylyp jatyr.

Kári qurlyqta koronavırýs indeti eýropalyqtardyń qaýipti aýrýǵa múlde daıyn emestigin kórsetip berdi. Osynaý qıyn ýaqytta áskerıler sanıtarlyq tazartqyshtar men qoraptarmen qarýlanyp, ınfektsııaǵa qarsy ymyrasyz kúres júrgizýde.

Eýropada vırýstan qatty zardap shekken Italııada armııa naýryz aıynyń ortasynda jalpy ulttyq karantındi qoldaýǵa jumyldyryldy. Áskerı dárigerler birneshe dalalyq aýrýhanany jasaqtasa, Italııa áskerı-áýe kúshteri shetelden dári-dármekter men qural-jabdyqtardy jetkizip, syrtta qalǵan azamattaryn elge qaıtarýda.

Koronavırýs anyqtalǵan adam sany boıynsha AQSh-tan keıin álemde ekinshi orynda turǵan Ispanııa 60 myńǵa jýyq áskerı qyzmetkerdi dezınfektsııalaýǵa jáne kóshelerdi patrýldeýge jumyldyrǵan. Qarýly kúshter muqtajdardyń bárine azyq-túlik pen negizgi qajetti zattardy taratyp júr.

Armııa HІH ǵasyrdyń basynda Ońtústik Amerıkadaǵy ıspandyq kolonııalardaǵy sheshekpen kúresý ekspedıtsııasyn basqarǵan ıspan dárigeri Fransısko Haver de Balmıstiń esimimen atalatyn «Balmıs» operatsııasy aıasynda mindetin atqaryp keledi.

Germanııa úkimeti óz kezeginde aımaqtyq bılik organdarynyń koronavırýsqa qarsy kúresine kómek kórsetý úshin shamamen 15 myń sarbazdy jumyldyrdy. Áskerıler medıtsınalyq tehnıkany taratýmen jáne ýaqytsha aýrýhanalardy ornalastyrýmen aınalysady.

Germanııa Eýropadaǵy basqa elderge qaraǵanda epıdemııamen tıimdi kúres júrgizip jatyr. Bul el búkil Eýropadan aýyr naýqastardy qabyldaýǵa qaýqarly. Arnaıy jabdyqtalǵan Býndesver áýe kúshteri mundaı naýqastardy Germanııa aýrýhanalarynda emdeý úshin tasymaldaıdy.

Áskerı dárigerler Frantsııada da azamattyq áriptesterimen birge ıyq tirese vırýspen kúresýde. Ondaǵy áskerı-teńiz kúshteri Frantsııanyń shetelderdegi densaýlyq saqtaý mıssııalaryna qatysady.

Al Qytaı halyq azattyq armııasy patsıentterdi emdeýden, dezınfektsııa jáne kóshelerdi patrýldeýmen qatar halyqqa dári-dármekter men qajetti zattardy jetkizýdi de óz moınyna alǵan.

Pandemııa armııanyń tek densaýlyq saqtaý jáne quqyq qorǵaý salasynda ǵana emes, áleýmettik qamsyzdandyrý salasyndaǵy azamattyq kúshterdi de tolyqtyra alatynynn kórsetti. Álemdi sheńgeline alǵan kesel osynaý qatal saladaǵy adamdardyń adamı sıpatyn kórsetip otyr.

Belgııada áskerı qyzmetkerler qarttar úıine kómek kórsetedi. Al polıak áskerıleri karantınge jatqyzylǵan adamdar men koronavırýspen aýyratyn naýqastarǵa psıhologııalyq qoldaý kórsetý úshin táýlik boıy jumys isteıtin arnaıy telefon jelisin ashqan.

Meksıkada vırýsqa qatysty kúrdeli jaǵdaı qalyptasqan. Osyǵan baılanysty áskerı adamdar azamattyq aýrýhanalardy basqarýdy óz moınyna aldy. Al Italııada áskerı qyzmetkerler marqumdardyń máıitterin zırattarǵa aparyp, kómedi.

Reseı armııasy kóp fýnktsııaly medıtsınalyq ortalyqtar salyp, Italııaǵa pandemııamen kúresýge kómektesýde. Al AQSh qarýly kúshteri baılanys ortalyqtaryna qoldaý kórsetip, azamattardyń suraqtaryna jaýap berip jatyr.

AQSh armııasynyń ınjenerleri aýrýhana sala bastady. Al AQSh Ulttyq gvardııasy qoǵamdyq oryndardy tazartyp, qoǵamnyń eń álsiz toptaryna qol ushyn sozǵan.

Amerıkalyq desant medıtsınalyq maska shyǵara bastady. Al ıspandyq áskerı kúshter sanıtarlyq tazartqyshtar men dári-dármekterdi óndirýde. AQSh, Qytaı, Izraıl jáne basqa elderdiń qorǵanys vedomstvolarynyń ǵalymdary pandemııa tehnologııalaryn zertteý men damytýǵa basa nazar aýdardy. Álem elderiniń áskeri qaýipti indetpen osylaı kúresip jatyr.

Avtory: Tımýr Dıýsekeev