Álem elderinen Qazaqstan tarıhyna qatysty sırek kitaptar jınalady

NUR-SULTAN. QazAqparat – El ishinde jáne álem elderi boıynsha Qazaqstan tarıhy men mádenıetine qatysty sırek kezdesetin kitaptarǵa izdeý salynady. Bul týraly qoljazbalar jáne sırek kitaptar ulttyq ortalyǵynyń dırektory Jandos Boldyqov málim etti, dep habarlaıdy QazAqparat tilshisi.

«Bizdiń ortalyqtyń qurylǵanyna 5 jyl boldy. Bolashaqqa jospar kóp. Sonyń biri - aldaǵy 3 jyl ishinde el ishin aralap, tól tarıhtan habar beretin sırek kezdesetin kitaptardy izdeý. Oblys, aýdandarda kópke beımálim qundy dúnıeler bar. Maqsat – solardy jınap, zertteý, óńdeý jáne kópshilik nazaryna usyný. Odan ári el tarıhyna qatysty sırek kezdesetin kitaptardy izdeý maqsatynda shetelge shyǵýdy kózdep otyrmyz. Jospar boıynsha 20-ǵa jýyq eldi aralaımyz. Tabylǵan dúnıelerdi elge alyp kelemiz. Osylaısha keleshek urpaqqa qaldyratyn mádenı muranyń sany arta túspek», - dedi Jandos Boldyqov.

Buǵan deıin Qazaq handyǵyna qatysty álemde balamasy joq 19 qoljazbanyń jınalǵany aıtylǵan edi.

Ulttyq ortalyq mamanynyń aıtýynsha, jınalǵan qoljazbalar aldaǵy ýaqytta kórmege qoıylyp, kópshilik nazaryna usynylmaq.

Aıta keteıik, búgin elordadaǵy Ulttyq mýzeıde tól tarıhtan syr shertetin sırek kezdesetin qoljazbalar kórmege qoıyldy .