Álem elderi vaktsınalaýdy qalaı mindettep jatyr
Máselen, Italııada buqaralyq is-sharalarǵa tek koronavırýsqa qarsy vaktsına alǵan adamdar ǵana jiberiledi. 6 tamyzdan bastap vaktsınalaý protsesin aıaqtaǵan Italııa turǵyndaryna ǵana buqaralyq sharalar, stadıondar, mýzeıler, teatrlar, kınoteatrlar, basseınder, sport zaldary, barlar men meıramhanalar qoljetimdi bolady. Barlar men meıramhanalardyń ashyq terrassalaryna kirý úshin vaktsınalaý pasporty qajet emes.
20 tamyzdan bastap Birikken Arab Ámirlikterinde vaktsına almaǵan azamattarǵa memlekettik jáne jeke mektepterge, ýnıversıtetterge, balabaqshalarǵa, saýda ortalyqtaryna, meıramhanalarǵa, kafelerge, sport zaldaryna, mýzeılerge, kýrorttarǵa jáne basqa da saýda núktelerine kirýge tyıym salynady.
Al Brazılııada joǵarǵy federaldy sot resmı túrde bılikke koronavırýsqa qarsy erikti vaktsınalaý kútiletin nátıje bermese, vaktsınalaýdy mindetteýge ruqsat berdi. Degenmen, bul sharany iske asyrý úshin jeke zań qabyldaý qajet. Sýdıalardyń pikirinshe, vaktsınalaýdan sanaly túrde bas tartqan adamdar kesirinen ujymdyq densaýlyq buzylmaýy kerek.
AQSh-ta Jumyspen qamtýdyń teń múmkindikteri jónindegi komıssııa azamattardyń ótinishi boıynsha jumys berýshiler óz qyzmetkerlerin COVID-19 vaktsınasyn alýǵa májbúr ete alady dep sheshti. Odan tek múgedektikke nemese dinı senimderge baılanysty bas tartýǵa bolady.
AQSh-tyń Morgan Stanley Banki Nıý-Iorktegi qyzmetkerlerine COVID-19 vaktsınasyn tolyq almasa, keńselerge orala almaıtyndaryn eskertti. Múldem vaktsına almaǵan nemese tolyq vaktsınalanbaǵan bank qyzmetkerleri qashyqtan jumys isteýge májbúr bolady, delingen qyzmetkerlerge jiberilgen ishki hatta.
Aqpan aıynda Indonezııada vaktsınany qalamaǵandar úshin aıyppuldar men áleýmettik kómekten bas tartý júıesi engizildi. Bul aıyppul baı elderdiń ólshemimen de óte aýqymdy, Djakartada 5 mıllıon rýpıı (350 dollar) salynady.
Qytaıda memlekettik deńgeıde vaktsınalaý erikti bolyp qala beredi, biraq jergilikti bılik qysym kórsetýde: Haınan provıntsııasyndaǵy ákimshilik vaktsınaǵa qarsy dıssıdentterdi qara tizimge engizýge jáne olardy memlekettik járdemaqylar men qoǵamdyq kólikti paıdalaný quqyǵynan aıyrýǵa ýáde berdi.
Belgııada 13 tamyzdan bastap 1500-den astam adam qatysatyn ashyq is-sharalar vaktsınalaý sertıfıkaty joq adamdar úshin shekteýli bolady.
Aýstralııada 28 maýsymda birqatar mamandyq úshin mindetti vaktsınalaý engizildi. Vaktsınasyz qart adamdarǵa kútim jasaýǵa baılanysty mekemelerde jumys isteýge bolmaıdy. Qarttar úıleriniń, múgedekter men qarttarǵa arnalǵan ınternattardyń barlyq qyzmetkerleri vaktsınanyń alǵashqy dozasyn 2021 jyldyń qyrkúıek aıynyń ortasynan keshiktirmeı alýy kerek. Tizbege memlekettik karantın júıesiniń, áýejaılar men avıatsııalyq ınfraqurylym qyzmetkerlerin, sondaı-aq óńiraralyq júk tasymaly men taý-ken óndirý salasynda jumys isteıtin qyzmetkerlerdi engizý josparlanýda.
