Álem elderi qarttar men jetimder úıin biriktire bastady
ASTANA. QazAqparat - Álem elderi qarttar men jetimder úıin biriktire bastady, dep jazady Habar 24.kz.
Portaldyń jazýyna, qazir álemniń birqatar elinde qarttar men jetimder úıin biriktirý qarqyndy damyp keledi. Mysaly, Ulybrıtanııada osyndaı ortalyqtyń ashylǵanyna 1 jyldaı bolǵan. Balalar men eresekter bir úıde qalaı turyp jatyr, bul ádistiń artyqshylyǵy nede?
Nightingale House ortalyǵy London qalasynda ornalasqan. Bul - Ulybrıtanııadaǵy qaraýsyz qalǵan qarttar men jetim balalar turatyn eń alǵashqy oryn. Munda olar kún saıyn birge ýaqyt ótkizip, áńgimelesedi.
Túrli býyn ókilderin bir ǵımaratta baǵyp-qaǵý ıdeıasy 1976 jyly Tokıo qalasynda paıda boldy. Al alǵash bolyp bul tájirıbeni AQSh engizdi.
«Mundaı ádistiń paıdasy kól-kósir», - deıdi sala mamandary.
Zertteý nátıjesi kórsetkendeı, mundaı qarym-qatynas egde jastaǵylardyń densaýlyǵyna oń áser etedi. Aıtýlarynsha, kún saıyn kishkentaı búldirshindermen sóılesken qarııanyń kóńil-kúıi jaqsaryp, jalǵyzdyq sezimi umtylyp, qan qysymy retteledi. Olar birge mýzyka, bı, sýret salýmen aınalysyp, áńgime-dúken quryp, tamaq daıyndaıdy. Osylaısha meıirimge zárý balalar mahabbatqa bólenip, al úlkender ónegesin olarǵa mıras etedi.
«Balalar kelmes buryn bul jer mazarǵa uqsaıtyn. Olar bizdi energııasymen qýattap, ómirge degen qulshynysty oıatady. Jasaryp qalamyz. Ózimniń balam joq. Aıtaıyn degenim: bul tájirıbe maǵan qatty unady»,-deıdi qarttar úıiniń turǵyny Feı Garsıa.
Mundaı ortalyqtar birneshe jyl buryn alǵash ret AQSh-ta ashyldy. Qazir Qurama Shtattarda osyndaı júzdegen mekeme bar. Bul tájirıbe kórshiles Kanada men Aspan asty elinde birtindep engizilip jatyr. Al Sıngapýr úkimeti aldaǵy jyldary osyndaı 10 mekeme ashýdy josparlap otyr.
Illıýstratsııalyq foto
