Álem elderi bıylǵy jańa jyldy qarapaıym qarsy aldy – BAQ
NUR-SULTAN. QazAqparat - Pandemııaǵa baılanysty álem elderi burynǵymen salystyrǵanda Jańa jyldy qarapaıym qarsy aldy, dep habarlaıdy QazAqparat VVS agenttigine silteme jasap.
Nıý-Iorkte alyp jarqyraǵan shar ádettegideı Taıms-skverdi jaǵalaı tústi, biraq munda bar bolǵany 15 myń adam jańa jyldy toılady. Olardyń árqaısysy vaktsınatsııa sertıfıkatyn kórsetýi kerek boldy. Ótken jyly osy alańǵa 58 myń kórermen kelgen.
Parıjde dástúrli otshashý qalalyq ákimdiktiń bir top dárigerlik keńesshileriniń keńesimen toqtatyldy, olar qazir qala ortalyǵynda kóp adamdardy jınaý tym qaýipti dep sanaıdy.
Bılik qazan aıynda onyń bolmaıtynyn habarlaǵanymen Londonda merekelik otshashý ótti. Nátıjesinde turǵyndardy qala ortalyǵyna barmaı, ne bolyp jatqanyn teledıdardan kórýge shaqyrdy. Tún ortasynda Bı-bı-sı efırde brıtan astanasynyń ártúrli bólikterindegi otshashýlar men drondarmen túsirilgen túrli-tústi shoý kórsetti.
Sonymen qatar 2017 jyldan beri alǵash ret Jańa jyldyń bastalýy Brıtan parlamentiniń ústindegi ataqty saǵat munarasynyń qońyraýy Bıg Benniń soǵýymen erekshelendi. Saǵattardy jóndeý tórt jyldan astam ýaqytty alyp, brıtandyq qazynaǵa rekordtyq 80 mıllıon fýnt (shamamen 110 mıllıon dollar) shyǵyn ákeldi.
Turǵyndarǵa tórt adamnan kóp toptasyp jınalýǵa tyıym salynǵan Nıderlandyda bılik karantındik sharalarǵa qaramastan Amsterdamnyń ortalyq alańyna kelgen birneshe myń adamdy alańnan shyǵarýǵa tyrysty.
Madrıdtiń ortalyq alańynda Jańa jyldy 7 myń adam toılady - bul ádette jınalatyn halyqtyń jartysy. Tún ortasyna deıin kórermender saǵattyń ár soǵýymen bir júzim jedi.
Dýbaıda qalanyń 29 jerinde birden 36 merekelik otshashý boldy.
