Álem elderi munaı qorynan 325 mln barreldi naryqqa shyǵardy – HEA
ASTANA. KAZINFORM – Halyqaralyq energetıka agenttigine (HEA) múshe elder strategııalyq qorlarynan shamamen 325 mln barrel munaı men munaı ónimderin naryqqa shyǵardy, dep habarlaıdy Euronews.
Bul naýryz aıynda memleketter naryqqa shyǵarýǵa mindettengen 400 mln barreldiń 80 paıyzdan astamyn quraıdy. Sheshimdi HEA-ǵa múshe 32 memleket agenttik elderi úkimetteriniń kezekten tys otyrysynda biraýyzdan qabyldaǵan. Jıyn álemdik munaı naryǵyndaǵy jaǵdaıdy baǵalaý jáne jetkizilimderdiń qysqarýyna baılanysty sharalardy talqylaý úshin shaqyryldy.
Osylaısha bastapqy kólemniń shamamen 75 mln barreli ǵana qaldy. Alaıda bul qorlardyń «Úlken jetilik» elderiniń munaı men munaı ónimderiniń 100 mln barrelin naryqqa shyǵarý týraly jańa sheshimimen baılanysty-qatysty ekeni ázirge belgisiz.
Bir kún buryn G7 elderi HEA-men úılestire otyryp, naryqqa shuǵyl túrde 100 mln barrel shıki munaı men dızel otynyn shyǵarýǵa kelisti. Jetkizilim tórt aıǵa eseptelgen. Onyń edáýir bóligi dızel otyny boıynsha alǵashqy 20 kúnde naryqqa shyǵarylady dep josparlanyp otyr.
G7 málimdemesinde jańa kólemge HEA-nyń naýryzdaǵy mindettemesi boıynsha qalǵan 75 mln barrel kire me, álde bul qosymsha qor ma, naqtylanbaǵan.
Álemdik otyn naryǵyna jetkizilimderdiń úzilýine baılanysty aıtarlyqtaı qysym túsip otyr. Jaǵdaıdy Ormýz buǵazy arqyly teńiz qatynasyna qoıylǵan shekteýler men munaı óńdeý kóleminiń qysqarýy qıyndata tústi.
G7 elderi munaı óńdeý zaýyttaryna tehnıkalyq qyzmet kórsetý kestelerin úılestirýge jáne múmkindik bolsa, olardyń óndiristik qýatyn arttyrýǵa da kelisti. Munaı óńdeý qýaty joǵary memleketterge munaı ónimderin, eń aldymen dızel otynyn óndirý kólemin ulǵaıtý usynyldy.
Aıta keteıik, buǵan deıin munaı baǵasy apta qorytyndysynda barreline $102-den joǵary deńgeıde qalyptasqanyn jazdyq.
Al keesh G7 elderi munaı qorynan 100 mln barreldi naryqqa shyǵaratynyn málimdegen edi.
