Alem Crypto Fund qoryn qurý vıtse-premer Jaslan Mádıevtiń lobbıi emes pe — mınıstrlik jaýaby
ASTANA. KAZINFORM — Jasandy ıntellekt jáne tsıfrlyq damý vıtse-mınıstri Dosjan Musalıev Alem Crypto Fund qory men vıtse-premer Jaslan Mádıevtiń arasyndaǵy qyzmettik baılanys týraly pikir bildirdi.
— Alem Crypto Fund qoryn qurý oqıǵasy osy bastamanyń ıesi, buryn Binance Kazakhstan kompanııasyn basqarǵan Jaslan Mádıevtiń vıtse-premer qyzmetine taǵaıyndalǵan kezimen dóp keldi. Mınıstrlik bul jerde múddeler qaqtyǵysy joq ekenine qandaı kepildik bere alady? Qordyń ashyq jumys isteýin qalaı qamtamasyz etpekshisizder, — dep surady BAQ ókili Úkimet otyrysynan keıin ótken baspasóz máslıhatynda.
Dosjan Musalıev jýrnalıst suraǵyna áıgili Google kompanııasyn mysalǵa keltire otyryp jaýap berdi.
— Bul qor jaqsy tetik dep oılaımyz. Óıtkeni ınvestıtsııa retinde tartylǵan krıptoqarjynyń bári osy qorǵa jınaqtalady. Tipti keleshekte qylmystyq toptardan tárkilengen aqsha da osy qorǵa túsýi múmkin. Ulttyq qor osylaı qurylady.
Múddeler qaqtyǵysyna kelsek, ondaı qaıshylyq kórip turǵan joqpyz. Óıtkeni Binance — Google sııaqty álem moıyndaǵan kompanııa. Google Qazaqstanda jumys istep turǵanyna qarap, lobbı bolyp jatyr dep eshkim aıtpaıdy ǵoı. Sondyqtan munda da eshqandaı múddeler qaqtyǵysy joq dep esepteımiz, — dedi vıtse-mınıstr.
Keıin osy másele boıynsha Jasandy ıntellekt jáne tsıfrlyq damý mınıstrliginiń baspasóz qyzmeti qosymsha túsinikteme berdi.
— Múddeler qaıshylyǵyna qatysty birer sóz. Jaslan Mádıev saıası memlekettik laýazymǵa taǵaıyndalmas buryn BN KZ Technologies Limited kompanııasyndaǵy jumysyn tolyq aıaqtaǵan. Mınıstrlerdi taǵaıyndaý qoldanystaǵy zańnama men rásimderge, sonyń ishinde deklaratsııalaý talaptaryna sáıkes júzege asyrylady, — delingen resmı málimette.
Mınıstrliktegiler Alem Crypto Fund qory Qazaqstan Venture Group basqarýymen jumys isteıtinin jáne «Astana» halyqaralyq qarjy ortalyǵynyń ekojúıesinde tirkelgenin eske saldy.
— Binance Kazakhstan kompanııasy — qordyń strategııalyq seriktesi. Alem Crypto Fund dál osy kompanııamen birlese otyryp, alǵashqy ınvestıtsııasyn jasap, BNB tokenin satyp aldy. Bul — BNB Chain jelisiniń negizgi tokeni, tranzaktsııalar júrgizýge, jelini basqarýǵa jáne komıssııa tóleýge múmkindik beredi.
Búginde BNB tokeniniń naryqtyq kapıtalızatsııasy 138 mlrd AQSh dollarynan asady, ol álemdik naryqtaǵy eń turaqty jáne yqpaldy tsıfrlyq aktıvterdiń biri. Aıta ketetin jaıt, qarjy naryǵynyń qubylýy — tsıfrlyq aktıv ekojúıesindegi qalypty jaǵdaı, — dep jazady vedomstvonyń baspasóz qyzmeti.
Eske salsaq, aı basynda Prezıdent Qasym-Jomart Toqaev Binance kompanııasynyń negizin qalaýshy Chanpen Chjaony qabyldaǵan edi.