Álem chempıony G. Golovkın kásipqoı bokstan ketkennen keıin Qazaqstanda boksty damytýǵa nıetti

Bul jaıynda ol búgin Astanada málim etti.

«Kásipqoı bokstan sporttyq mansabym aıaqtalǵannan keıin Qazaqstanda kásipqoı boksty damytýǵa atsalysqym keledi. Eger áýesqoı boks jaıynda sóz qozǵalatyn bolsa, onda bul baǵytta da eńbek etýge daıynmyn»,-dedi G. Golovkın.

1982 jyly 8 sáýirde Qaraǵandyda ómirge kelgen Gennadıı Golovkın buǵan deıin 22 kezdesý ótkizip, onyń bárinde de (19-y nokaýtpen) jeńiske jetken bolatyn. Kásipqoı boks rıngindegi alǵashqy jekpe-jegin 2006 jyly 6 mamyrda Germanııadaǵy Nordrheın-Ýestfalende (Nordrhein-Westfalen) ótkizip, Gabor Valoghty (Gabor Balogh) nokaýtpen utqan edi. 2009 jyly 11 maýsymda Germanııada John Anderson Karvalhomen (John Anderson Carvalho) bolǵan saıysta Búkilálemdik boks qaýymdastyǵynyń Qurlyqaralyq chempıony ataǵyn jeńip alǵan Gennadıı 2010 jyly 14 tamyzda Panamada Mılton Nýnezben ( Milton Nunez) bolǵan kezdesýde Álem chempıony beldeýin beline baılaǵan bolatyn. Odan keıin Gennadıı 2010 jyly 16 jeltoqsanda Astanada Nılson Jýlıo Tapıany (Nilson Julio Tapia), al 2011 jyly 17 maýsymda Panamada Kassım Oýmany (Kassim Ouma) nokaýtpen utyp óz ataǵyn sátti qorǵap shyqqan edi. Munymen qosa, bıylǵy jeltoqsan aıyndaǵy sońǵy kezdesýinde Gennadıı Golovkın birinshi raýndta 32 jastaǵy amerıkandyq Lahýan Saımondy nokaýtpen jeńip, ataǵyn qorǵap qaldy.

G. Golovkın búginde sýperchempıon Felıks Shtýrmmen jekpe-jek ótkizý boıynsha kelissózder júrip jatqandyǵyn jetkizdi.

Budan buryn habarlanǵandaı, búgin Aqordada QR Memlekettik hatshysy Qanat Saýdabaev Gennadıı Golovkınge «Parasat» ordenin tapsyrdy.