Álem chempıony Aıbek Shaýkılov: Fınaldyq básekede Kók tý jigerimdi janydy
ASTANA. QazAqparat - Ýkraınada kıokýshınkaı-kan karateden ótken Álem chempıonatynda altyn medal alǵan 17 jastaǵy qyzylordalyq oqýshy Aıbek Shaýkılov jas ta bolsa jarqyn jeńisimen eliniń úmitin aqtap keldi. «Elim» degen órenniń rýhy asqaq, maqsaty aıqyn. «QazAqparat» HAA tilishisimen áńgimesinde jas chempıon jeńistiń eń bıik tuǵyryna qalaı jetkenin aıtyp berdi.
«16-17 jas aralyǵyndaǵy 55 kelige deıingi salmaq dárejesinde jarys kilemine shyqtym. Alǵashqy qarsylasym Iran elinen kelgen sportshy boldy. Aıqas men úshin sátti ótti. Ippon ádisimen, ıaǵnı tolyq upaımen ırandyq qarsylasymdy tize búktirdim. Ekinshi jáne úshinshi kezdesýde eki birdeı ıspandyq jáne gollandııalyq qarsylaspen orynǵa talastyq. Іri jarystarda bir baıqaǵanym, zaldaǵy kórermenniń áseri kúdik pen úmittiń arasyndaǵy ekiudaı kúıde qaldyrady eken. Ispandyq qarsylasym dene myǵymdyǵy týrasynan anaǵurlym iri bolǵanymen, ony kóptiń mysy basyp ketken sekildi. Bul rette meni jattyqtyryp júrgen Baýyrjan Muqanovtyń bizdi daıyndaý ádisin erekshe aıta ketkim keledi. Bapkerimiz bizdi dene mashyǵymyzben birge, psıhologııalyq turǵyda kóp daıyndaıdy. «Rýhyńnyń túskeni - jeńistiń jartysynan kóbin berip qoıǵanyń» dep úıretedi», - deıdi Aıbek.
Jas chempıonnyń aıtýyna qaraǵanda, fınalda kezdesken ulty gúrji qarsylasyn utý óte ońaıǵa túspegen kórinedi. Myqtynyń myqtysy irikteletin aqtyq dodada kóptiń tilek-batasy oryndalyp, otandasymyz altyn medaldi qanjyǵasyna baılaǵan.
«Gúrji qarsylasymnan jasqanǵanymdy jasyrmaımyn. Biraq, qarsylasymmen ańdysqan sátterimniń birinde zalda jerlesterim jelbiretken Kók týymdy kózim shalyp qaldy. Jelbiregen Tý jeńiske jetelegen sekildi. Boıymdy tez jıyp, shapshań ádis-amaldarmen tuǵyrǵa kóterildim», - deıdi chempıon.
Aıbek 2001 jyly Qyzylorda oblysynda dúnıege kelgen. Kokýshınkaı-kan karatege qatysqanyna 8 jyldaı bolyp qalypty. Qyzylorda qalasyndaǵy №101 mektepte oqıdy.
«Respýblıkalyq dodalarda top jaryp júrgennen keıin Álem chempıony bolsaq degen armanymyz bar edi. Bul belesti baǵyndyrǵanym úshin qýanyshym sheksiz. 11 synyp oqyp júrmin. Bıyl mektep bitiretindikten, mamandyǵymdy tańdap qoıǵanymdy aıta alamyn. Sátin salsa, sporttyq JOO-lardyń birinde bilim alsam deımin», - deıdi Aıbek.
Jas chempıon qatarlastaryna qaraǵanda erekshe daǵdysy bolǵanymen, kóshe tóbelesine barynsha bas suqpaýdy oılaıtynyn aıtady.
«Álbette, jas bolǵasyn túrli jaǵdaılar týyndaýy múmkin. Alaıda ózgeden erekshe daǵdymdy sport zalynan basqa eshqaıda qoldanbaýǵa bekingenbiz. Sebebi, bapkerimizdiń qatań qaǵıdaty osy. Sabaq jáne sportqa den qoıyp, keleshekte bıik maqsattardy baǵyndyrýdy kózdeımin», - deıdi chempıon.
Eske sala ketsek, Ýkraınanyń Odessa qalasynan «altynǵa toly» qorjynmen oralǵan sańlaqtarymyzdyń basyn Ulttyq respýblıkalyq Kıokýshınkaı-kan karate federatsııasy búgin Astanadaǵy «Saryarqa» velotreginde qosqan bolatyn. Qazaq sportshylary atalǵan dodadan 12 altyn, 4 kúmis pen 1 qola medal alyp kelip otyr.
Federatsııa prezıdenti Omarhan Óksikbaevtyń aıtýynsha, Qazaqstan sportshylary buryn sońdy kıokýshınkaı-kan karateden Álem chempıonatynda mundaı zor jetistikke qol jetkizbegen.
