Álem chempıony atanǵan Eleýsinovtiń esimi otandyq boks tarıhyna endi
Eleýsinov kásipqoı boksta álem chempıony tıtýlyn jeńip alǵan qazaqstandyq 5-inshi boksshy bolyp otyr. D. Eleýsinov H.Lealmen ótken jekpe-jekte jartylaı orta salmaqta IBO-nyń vakantty beldigin jeńip aldy.
Buǵan deıin Qazaqstan boksshylary arasynan álem chempıony atanǵandar: Vasılıı Jırov (38-3-1, 22 KO), Gennadıı Golovkın (41-1-1, 36 KO), Janat Jaqııanov (27-2, 18 KO) jáne Beıbit Shúmenov (18-2, 12 KO). Olardyń arasynda búginde kásipqoı boksta mansabyn jalǵastyryp jatqany – 39 jastaǵy Gennadıı Golovkın. Ol orta salmaqtaǵy IBF jáne IBO beldikterine ıe. Onyń aldynda Golovkınge WBA Super jáne WBC beldikteri tıesili bolǵan edi.
Eske salaıyq, keshe elordada QR Táýelsizdiginiń 30 jyldyq mereıtoıyna oraı kásipqoı boks keshi ótti. Onda 14 qazaqstandyq boksshy ónert kórsetti. Keshtiń basty aıqasy Danııar Eleýsinov pen Hýan Ernan Leal arasynda ótti. 12 raýndqa eseptelgen jekpe-jek sońyna deıin jalǵasyp, tóreshilerdiń sheshimimen Eleýsinovtiń jeńisimen aıaqtaldy.
Sondaı-aq Erjan Zalılov Eskendir Harsanmen judyryqtasyp, Qazaqstan chempıony ataǵyna ıe boldy.
Ózge nátıjeler:
1. Ivan Dychko (Qazaqstan) Aleksandr Ýstınovty (Reseı) jeńdi.
2. Elhan Tabynbaev (Qazaqstan) Elmar Abdýllaevty (Ázerbaıjan) jeńdi.
3. Aqnıet Álimbaı (Qazaqstan) Zaınobıddın Sobırovty (Ózbekstan) jeńdi.
4. Aıdar Ámirzaqov (Qazaqstan) Dılshodbek Isroılovty (Ózbekstan) jeńdi.
5. Asqat Jantursynov (Qazaqstan) Sýrat Garaevtan (Ázerbaıjan) jeńilip qaldy.
6. Saparbaı Aıdarov (Qazaqstan) Andreı Shemetovty (Ýkraına) jeńdi.
7. Aıdar Sháribaev (Qazaqstan) Shohrýh Abdıevti (Reseı) jeńdi.
8. Dáýlet Dáýkenov (Qazaqstan) Eldorbek Saıdovty (Ózbekstan) jeńdi.
9. Angelına Lýkas (Qazaqstan) Svetlana Vasılevskaıany (Ýkraına) jeńdi.
10. Dáýren Eleýsinov (Qazaqstan) Alı Mammadovty (Ázerbaıjan) jeńdi.
11. Janqosh Turarov (Qazaqstan) Abdýmonem Saıdty (Mysyr) jeńdi.
Boks keshi «Habar» telearnasynyń tikeleı efırinen kórsetildi.
